Жанубий Африка Республикаси шарқида жойлашган Дурбан шаҳрида кузатилган сув тошқинлари оқибатида 306 нафар одам ҳалок бўлди. Бу ҳақда мамлакат ҳукумати ахборотига таяниб, The Guardian хабар берган.
Қайд этилишича, 60 йил ичида кузатилган энг катта сув тошқинлари туфайли Дурбанда ва шаҳар атрофидаги ҳудудларда кўприклар ҳамда йўлларга жиддий талафот етган. Поездлар қатновида муаммолар кузатилган. 6000 дан зиёд хонадон зиён кўрган. Кучли шамол Африкадаги энг муҳим юк контейнерларини Дурбан порти бўйлаб сочиб ташлаган, соҳилдаги фаолият тўхтаб қолган.
The Guardian нашрининг ёзишича, бир қатор ҳудудларда шоссе сув билан қопланиши оқибатида светофорларнинг ҳам фақат юқори қисми кўринмоқда.
Синоптик Дипуо Таваннинг сўзларига кўра, Жанубий Африканинг Квазулу-Натал провинциясида охирги 48 соат давомида 450 миллиметр миқдорида ёғингарчилик кузатилган ва бу Дурбандаги 1009 миллиметрли йиллик меъёрий кўрсаткичнинг қарийб ярми.
ЖАР президенти Дурбан ва унинг атрофидаги сув тошқинларидан талафот кўрган ҳудудларда бориб, у ердаги аҳолига ҳамдардлик билдирган.
Аввал Бразилияда юз берган сув тошқинлари ва кўчки оқибатида 150 дан зиёд одамнинг ҳалок бўлгани, Мадагаскарга ёпирилган бўрон қурбонларининг сони 100 дан ошгани, Эквадор пойтахтидаги сув тошқини оқибатида 11 киши ҳалок бўлгани ҳақида хабарлар берилган.
Изоҳ (0)