Россия Киевдаги марказларга зарба бериш билан таҳдид қилди

Россия Мудофаа вазирлиги Украина Қуролли кучлари Россияда қўпорувчилик ҳаракатларини давом эттираверса, мамлакатнинг «қарорлар қабул қилинаётган марказлари», жумладан, Киевга зарба беришини маълум қилди. Бу ҳақда идоранинг расмий вакили Игорь Конашенковга таяниб, «Интерфакс» хабар берди.

«Украина қўшинлари томонидан Россия ҳудудидаги объектларга зарба бериш ва қўпорувчилик ҳаракатларини амалга оширишга уринишлар бўлаётганини кўряпмиз. Агарда бу каби ҳолатлар давом этса, Россия Қуролли кучлари томонидан қарорлар қабул қилувчи марказларга, жумладан, Киевга зарба берилади. Россия армияси шу кунга қадар буни амалга оширишдан тийилиб келмоқда», — дейди Конашенков.

1 апрель куни эрталаб Россиянинг Белгород вилоятида «Роснефть»га қарашли нефть базаси ёниб кетганди. Белгород вилоят губернатори Вячеслав Гладковнинг сўзларига кўра, «Россия ҳудудига Украина Қуролли кучларининг паст баландликда кирган икки вертолётидан» нефть базасига авиазарба берилган. Россия Мудофаа вазирлигига кўра, ҳужум Украинанинг Ми-24 вертолётлари ёрдамида амалга оширилган. Украина томони бунга алоқадорлигини рад этган.

13 апрель куни Курск вилоятида россиялик чегарачилар «Украина томонидан» ўққа тутилгани айтилди. Вилоят губернатори Роман Старовойтнинг сўзларига кўра, Россия томонидан қурбонлар йўқ.

Аввалроқ Россия Мудофаа вазирлиги Мариуполда Украинанинг 1026 нафар денгиз пиёдаси таслим бўлганини маълум қилганди.