Zelenskiy Medvedchukni ukrainalik asirlarga almashishni taklif qildi

Ukraina prezidenti Vladimir Zelenskiy Rossiyaga hibsga olingan “Muxolifat platformasi — Hayot uchun” partiyasi rahbari Viktor Medvedchukni asirdagi ukrain yigit-qizlariga almashishni taklif qildi. Bu boradagi murojaat Ukraina yetakchisining Telegram kanalida paydo bo‘lgan.

“Men uning harbiy kamuflyajdan foydalanishini, ayniqsa, orsizlik deb bilaman. Shu orqali maskirovga qilmoqchi bo‘lgan. Mana shunday ‘jangchi’. Mana shunday ‘vatanparvar’. Demak, Medvedchuk o‘ziga harbiy formani tanlagan bo‘lsa, u harbiy davr qoidalariga bo‘ysunadi”, — deb yozadi Zelenskiy.

Uning so‘zlariga ko‘ra, Medvedchuk “48 kun yashiringan”, shunda so‘ng Ukraina chegarasini kesib o‘tmoqchi bo‘lgan. Zelenskiy harbiylar va huquq-tartibot organlari xodimlarini Medvedchukni almashish imkoniyatini ko‘rib chiqishga chaqirgan.

Avvalroq Vladimir Zelenskiy urush boshida uy qamog‘idan qochib ketgan “Putinning qadrdoni” Medvedchukning hibsga olinganini ma’lum qilgandi. “Ukraina xavfsizlik xizmati maxsus operatsiyani muvaffaqiyatli bajardi, barakalla”, — deb yozgan Ukraina prezidenti. Zelenskiy Medvedchukning qanday qo‘lga tushirilgani yuzasidan tafsilotlarni keyinroq oshkor etishini bildirgan. Ukraina xavfsizlik xizmati ham hibsga olingan siyosatchi fotosuratini tarmoqqa yuklagan.

Rossiya prezidentining matbuot kotibi Dmitriy Peskov Medvedchukning Kiyevda hibsga olingani haqidagi axborotni tasdiqlamagan. “Mazkur xabarning qayd darajada haqqoniyligi yuzasidan aniq bir nima ayta olmayman. Tasdiqlaydigan axborotlarsiz nimadir deyish qiyin… Ukrainada feyk xabarlar shu darajada ko‘p, ularning soni mamlakatda qanday saralanayotganiga ham shubham bor”, — degan u.

Viktor Medvedchuk Ukrainadagi Rossiya tarafdori bo‘lgan eng obro‘li siyosatchilardan biri hisoblanardi. OAVda uni Rossiya prezidenti Vladimir Putinning “qadrdoni” deb ham atashgan. 2019-yilda Medvedchukga nisbatan davlatga xiyonat bo‘yicha ish qayta boshlangan, biroq jarayon sudgacha yetib bormasdan yopilgandi.