Европа космик агентлиги (EКА) Россиянинг «Луна-25», «Луна-26» ва «Луна-27» миссияларини тарк этганини эълон қилди.
«ЭкзоМарс» билан боғлиқ ҳолатдаги каби Россиянинг Украинага нисбатан зўравонлиги, ундан кейин Москвага нисбатан қўлланилган санкциялар вазиятни кескин ўзгартириб юборди ва EКАнинг ойни тадқиқ қилиш юзасидан режалаштирган ишларини амалга ошириш имконсиз бўлиб қолди», — дейилади агентлик баёнотида.
EКАнинг қўшимча қилишича, «Луна» миссиясида фойдаланилиши лозим бўлган Европа илмий ва борт қурилмалари бошқа дастурларни амалга оширишда ишлатилади. Масалан, «Пилот-Д» камераси ва навигация тизимини синовдан ўтказиш парвози юзасидан келишув мавжуд. Аввал ушбу камерани «Луна-25» миссияси доирасида текшириб олиш режалаштирилаётганди.
Prospect бурғулаш аппарати ва учар заррачалар таҳлили учун ускуналар «Луна-27» миссиясида ишлатиши кўзда тутилганди, энди улардан NASAнинг ойни тадқиқ қилиш бўйича миссияларида фойдаланилади.
«Роскосмос» раҳбари Дмитрий Рогозин EКА қарорига муносабат билдириб, Telegram’да қуйидаги постни қолдирган:
Энди уларнинг қурилмаларини аппаратларимиздан ечиб ташлаймиз. Европалик хонимча отдан тушса, рус тулпори янада тезроқ чопади.
Март ойида Европа космик агентлиги Марсни тадқиқ қилишда «Роскосмос» билан ҳамкорликдан бош тортган, Россиянинг Марсга ўзи миссия жўнатмоқчи эканлиги хабар қилинганди.
Мавзуга доир: NASA 2040 йилгача Марсга астронавтларни олиб чиқмоқчи
Изоҳ (0)