Ўнглар — «Миллий бирлашув» партиясидан Франция президентлигига номзод Марин Ле Пен Евроиттифоқ таркибидан мамлакатни чиқариш унинг сиёсий режаларига киритилмаганини маълум қилди. Номзод аёл ЕИ янада такомиллашишининг тарафдори эканини қайд этди, деб ёзмоқда «Коммерсантъ».
«Аммо мен Европа тузилмаси эволюцияга учрашини истайман. Бу ҳақда бир неча йилдан бери гапириб келаман. Европадаги охирги сайловларда ҳам бу тўғридаги таклифларимни айтганман. Биз эркин ва суверен Европа миллатлари альянсини тузишни истаймиз», — деган Ле Пен хоним журналистлар билан суҳбатда («РИА Новости» иқтибоси).
Президентлик сайлови кампанияси вақтида Марин Ле Пен мамлакат раҳбарлигига сайланса, Францияни ЕИ ҳамда НАТО аъзолигидан чиқаришни, шунингдек, евро рад этилиши, иккинчи фуқаролик бериш имкониятидан воз кечилишини ваъда берганди. Бироқ орадан ҳеч қанча вақт ўтмай, Ле Пен ушбу ваъдаларидан воз кечган.
10 апрель куни Францияда президентлик сайловларининг биринчи тури бўлиб ўтди ва амалдаги президент Эммануэль Макрон 27,84 фоиз овоз, Марин Ле Пен эса 23,15 фоиз овоз билан сайловларнинг иккинчи турига ўтгани маълум бўлди.
Маълумот учун, 2014 йилгача жамоатчиликка унча таниш бўлмаган Макрон ўша йили бош вазир Мануэль Валс ҳукуматида Франция иқтисодиёт вазири этиб тайинланган. Бу лавозимда икки йил фаолият олиб борган Макрон 2016 йилда ўз партиясини тузиб, вазирликдан истеъфо берган ва президентлик сайловида қатнашиш учун номзодини илгари сурган. 2017 йил май ойида бўлиб ўтган сайловда мутлақ ғалаба қозониб, Франция Республикасининг навбатдаги президенти этиб сайланган — бу билан у Франция тарихида энг ёш президент бўлди.
Изоҳ (0)