Франция ҳарбий разведкасининг раҳбари, генерал Эрик Видо разведка Франция раҳбариятига Россиянинг Украинада ҳарбий операция ўтказиш режалари ҳақида етарли маълумот бера олмагани учун ўз лавозимини муддатидан олдин тарк этмоқда. Бу ҳақда L’Opinion газетаси, шунингдек, AFP агентлиги ва France Info нашрининг манбалари хабар бермоқда.
Генерал ўзининг истеъфоси ҳақида 30 март куни олган электрон почта хати орқали хабар топган. Видо «етарлича маълумот йўқлиги» ва «мавзудан етарлича хабардор бўлмагани» туфайли ишдан бўшатилган», деб ёзади нашрлар ҳарбий манбаларга таяниб.
AFP хабарига кўра, юқори мартабали зобитнинг ишдан бўшатилиши ҳақидаги маълумотлар бир неча кун аввал пайдо бўлган. Видонинг бошқа лавозимга тайинланиши кутилганди, аммо якунда бундай бўлиб чиқмади.
Март ойи бошида, Россиянинг Украинадаги ҳарбий амалиёти бошланганидан кўп ўтмай, Франция Бош штаби бошлиғи генерал Тери Буркхард Le Monde газетасига берган интервьюсида француз разведкаси Америка разведкасидан фарқли ўлароқ, Москванинг ҳарбий амалиёт режалари ҳақидаги прогнозларида янглишганини тан олганди.
Видо Бош штабга бўйсунувчи ҳарбий разведкани етти ой давомида бошқарди. У мазкур лавозимга 2021 йилнинг ёзида тайинланганди. Илгари у Франциянинг махсус операциялар қўмондонлигини (Commandement des Operations Speciales ёки COS) бошқарган.
Россия президенти Владимир Путин 24 февраль куни Украинада «денасификация ва демилитаризация» мақсадида ҳарбий операция бошланганини эълон қилди. Киев Москва билан дипломатик муносабатларни узди ва ҳарбий ҳолат жорий қилди.
Ўшандан бери Путин ва Франция президенти Эммануэль Макрон бир неча бор телефон орқали гаплашиб, Украинадаги вазиятни муҳокама қилган. Икки давлат раҳбарларининг сўнгги суҳбати 29 март куни бўлиб ўтган, унда бошқа нарсалар қатори тинч аҳолини Мариуполдан эвакуация қилиш билан боғлиқ масалалар кўтарилган: Россия Мудофаа вазирлиги Мариуполда гуманитар фалокат юз берганини эълон қилганди, шаҳар мери Вадим Бойченко эса шаҳарда қолган аҳолининг ҳаммасини эвакуация қилишга чақирган, чунки Мариуполда электр, иссиқлик ва ичимлик суви тугаган.
Изоҳ (0)