Арманистон фавқулодда вазиятлар вазири коррупцияда гумон қилиниб ҳибсга олинди

Арманистон фавқулодда вазиятлар вазири Андраник Пилоян коррупцияда гумон қилиниб ҳибсга олинди. Бу ҳақида «Жоховурд» хабар берди.

Газета маълумотларига кўра, Арманистон коррупцияга қарши курашиш қўмитаси ФВВнинг айблов эълон қилинган 150 га яқин мансабдорини сўроқ қилган, 5 нафар ходим ҳибсга олинган.

ФВВ ходимлари бир қатор коррупциявий келишувларда, хусусан, вазирликда турли лавозимларни эгаллаш учун пора олишда иштирок этганликда, Пилоян ҳам мазкур коррупциявий занжирнинг бир ҳалқаси бўлгани гумон қилинмоқда.

Арманистон коррупцияга қарши курашиш қўмитасининг вакиллари Пилояннинг ҳибсга олинганини тасдиқлаган, деб ёзмоқда Спутник Арманистон.

Пилоян ФВВ раҳбари лавозимига тайинлангунига қадар 20 йил давомида, яъни 2020 йил ноябргача республика Мудофаа вазирлигида ишлаган. У Арманистон қуролли кучлари сафига 1993 йилда қабул қилинган. Дастлаб разведка бўлинмаси бошлиғи сифатида фаолият олиб бориб, кейинчалик ўқчилар полки командири лавозимигача кўтарилган.

1998 йилда Арманистон Мудофаа вазирлиги ҳарбий қисмларидан бирида хизматни бошлаб, 2020 йилга бориб ҳарбий бирлашма командири лавозимида ишлаган. Пилоян 2020 йил июль ойида генерал майор унвонини олганди.

Шунингдек, 2020 йил октябрда Тоғли Қорабоғдаги ҳарбий низода, жанубий фронт Арсахдаги жангларда иштирок этган. Шу йили 22 октябрда Пилоян Арманистон миллий қаҳрамони унвонига сазовор бўлган.

Эслатиб ўтамиз, 2022 йил 27 март куни Тоғли Қорабоғ ҳукумати ҳарбий ҳолат эълон қилган, бироқ Озарбайжон Тоғли Қорабоғдан қўшинларини олиб чиқиш ҳақидаги Россия чақириғини рад этди ҳамда у ер ўз ҳудуди эканини билдирган. 28 мартда Россия Озарбайжон ўз қўшинларини Тоғли Қорабоғдаги қишлоқдан олиб кетганини маълум қилди, аммо Боку буни рад этган.