Украина президенти Владимир Зеленский АҚШ давлат раҳбари Жо Байден билан телефон суҳбатида унга Киев ҳамда Москва ўртасидаги музокараларнинг бориши ҳақида маълумот берди, дея хабар қилди Оқ уй матбуот хизмати.
«Зеленский президент Байденга Украина ва Россия музокараларининг мақоми ҳақида ахборот берди», — дейилади хабарда.
Ўз навбатида Байден Зеленскийга АҚШнинг Украина ҳукуматига 500 миллион доллар миқдорида тўғридан-тўғри бюджет ёрдами тақдим этишга тайёрлигини билдирган.
Бундан ташқари, икки давлат раҳбарлари АҚШ ва унинг иттифоқчилари томонидан берилаётган ижтимоий ҳамда ҳарбий ёрдам масалалари, шунингдек, Россияга нисбатан қўлланадиган янги санкцияларни муҳокама қилган.
Россия Украинада махсус ҳарбий операцияларни бошлаганидан бери томонлар низони тинчлик йўли билан ҳал этиш мақсадида бир неча марта музокаралар ўтказди. 29 март куни Москва ва Киев делегациялари Истанбулда музокараларнинг яна бир раундини ўтказган. Учрашув якунига кўра, Россия Украинадан вазиятни сиёсий йўл билан ҳал этиш юзасидан ёзма таклифларни олган.
Украина делегацияси раҳбари Давид Арахамия Киевнинг давлатга бетарафлик мақоми берилиши кўзда тутилган, хавфсизлик кафолатлари тизимини таклиф этаётганини айтган. Унинг сўзларига кўра мазкур тизимга БМТ хавфсизлик кенгашининг доимий аъзолари, шунингдек Туркия, Германия, Италия, Исроил, Польша ва Канада кафил бўлади.
Россия делегацияси раҳбари Владимир Мединский ҳам Киевдан Украинага бетарафлик ва ядро қуролидан ҳоли бўлишлик мақоми ҳақидаги таклифлар олинганини тасдиқлади. У Украина таклифларида барча турдаги оммавий қирғин қуролларини ишлаб чиқариш ва мамлакат ҳудудига жойлаштиришдан воз кечиш кўзда тутилганини маълум қилган. Мединский Киев таклифларида Россиянинг Украинани Европа иттифоқи таркибига киришига қарши чиқмаслиги ҳисобга олинганини таъкидлаган.
«Украина Қрим ва Донбассни ҳарбий йўл билан қайтариш фикридан йироқ. Украинанинг хавфсизлик кафолатлари бўйича таклифлари Қрим ҳамда Донбассга тааллуқли эмас. Россия Украинанинг Европа иттифоқига киришига қарши эмас», — деган Россия делегацияси вакили Владимир Мединский.
АҚШ давлат котиби Энтони Блинкен Россия—Украина музокараларининг бориши юзасидан ўз изоҳида Вашингтоннинг Москва баёнотларига эмас, балки Киев ҳаракатларига қараб мўлжални олишини қайд этган.
«Россия берган ваъда ва унинг амалда бажарилиши қандай кетаётганини фарқлаб олиши керак. Биз ваъдаларнинг бажарилишига эътибор қаратамиз», — деган Блинкен.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)