Қисман тан олинган Жанубий Осетия республикаси Россияга қўшилиш учун тез орада «қонуний қадамлар»ни қўяди. Бу ҳақда республика президенти Анатолий Бибилов маълум қилди, унинг мурожаати «Ягона Россия» сайтида эълон қилинган.
«Россия билан бирлашиш бизнинг стратегик мақсадимиз, деб ҳисоблайман. Бизнинг йўл. Одамларнинг интилишлари. Ва биз бу йўлдан борамиз. Яқин кунларда тегишли қонуний чоралар кўрамиз. Жанубий Осетия республикаси ўзининг тарихий ватани – Россиянинг бир қисми бўлади», — деган Бибилов.
Унинг матбуот хизмати Жанубий Осетиянинг Россия таркибига кириши бўйича барча қонуний тартиб-қоидалар республикада 10 апрель куни бўлиб ўтадиган президентлик сайловларидан сўнг якунланишини маълум қилган.
Қисман тан олинган Абхазия республикасининг парламент спикери Валерий Кварчия эса республика Россия таркибига кирмоқчи эмаслигини айтди. «Абхазиянинг Россия Федерацияси таркибига қўшилиши ҳақида гап йўқ. Абхазия конституциясида мамлакатимиз мустақил давлат деб эълон қилинган», — дея унинг сўзларидан иқтибос келтирган «Интерфакс». Шу билан бирга, Квачия «Абхазия конституцияси, хусусан республика мустақиллигини тугатиш ҳақида гап кетганда ўзгартирилиши мумкинлигини» қўшимча қилди.
Ўзини ўзи республика деб эълон қилган Луганск раҳбари Леонид Пасечник 27 март куни яқин орада республикада Россия таркибига қўшилиш бўйича референдум ўтказилишини маълум қилганди. Кейинроқ у ҳозир ҳеч ким референдумга тайёргарлик кўрмаётгани, чунки асосий мақсад «урушни тугатиш» экани ҳақида баёнот берди.
29 март куни Донецк раҳбари Денис Пушилин ҳам Россияга қўшилиш масаласи кўриб чиқилиши ҳақида маълум қилди. «Аммо ҳозир асосий вазифа республиканинг конституциявий чегараларига етиб боришдир. Қарорни кейин қабул қиламиз», — дея қўшимча қилди Пушилин.
29 март куни Россия Мудофаа вазири Сергей Шойгу Украинадаги махсус ҳарбий операциянинг асосий вазифалари бажарилганини, шунинг учун энди асосий мақсад – Донбассни озод қилишга эътибор қаратиш имконияти борлигини айтди.
Изоҳ (0)