Бухорода автотранспорт воситасига ноқонуний газ баллон ўрнатган ташкилот раҳбарлари жавобгарликка тортилди. Бу ҳақда «Дарё»га вилоят ИИБ ЙҲХБ ахборот хизмати раҳбари Улуғбек Шукуруллаев хабар берди.
Вилоят ИИБ ЙҲХБ ходимлари автотранспорт воситаларига ўрнатилган газ баллонларидан фойдаланишда келиб чиқаётган кўнгилсизликлар сабабини аниқлаш мақсадида назорат рейдлари ўтказган.
Рейдлар давомида вилоятда фаолият юритувчи уч нафар мансабдор ўз хизмат автомобилига ноқонуний тарзда газ баллон ўрнатгани маълум бўлган.
«Ҳайдовчилар ушбу ноқонуний хатти-ҳаракатларидан раҳбарлари хабардорлигини айтиб, бунга мансабдорларнинг оғизаки топшириғига кўра қўл урганини маълум қилган. Оқибатини билиб ўзбошимчаликка йўл қўйган уч нафар раҳбар қонуний жавобгарликка тортилди», — дейди вилоят ИИБ ЙҲХБ ахборот хизмати раҳбари Улуғбек Шукуруллаев.
Вилоят Йўл ҳаракати хавфсизлиги бошқармаси ахборот хизмати раҳбари «Дарё» мухбирининг жавобгарликка тортилган раҳбарлар айнан қайси ташкилот масъуллари экани тўғрисидаги саволини очиқ қолдирган.
Шукуруллаевнинг қўшимча қилишича, вилоятда, шунингдек, меъёридан ортиқ босимда газ тўлдираётган 5 та ва тегишли ҳужжатлари бўлмаган ёки газ баллони синовдан ўтказилмаган автомобилга газ тўлдираётган 16 та шохобча ҳам жавобгар қилинган.
«Вилоятда ноқонуний тарзда газ мосламаси ўрнатилган 89 та, газ баллонлари синовдан ўтказилмаган 34 та транспорт воситалари борлиги аниқланди. Умуман талабга жавоб бермайдиган 29 та газ баллони ечиб олинди. Уларнинг ҳайдовчиларига нисбатан ўрнатилган тартибда ҳужжатлар расмийлаштирилди», — дейди Улуғбек Шукуруллаев.
Изоҳ (0)