Туркия президенти Ражаб Тоййиб Эрдўғон Ўзбекистонда бўлиб турибди. Айни вақтда икки мамлакат етакчилари иштирокида Ўзбекистон—Туркия стратегик шериклик кенгашининг иккинчи йиғилиши бўлиб ўтмоқда, деб хабар «Дарё» мухбири.
Қайд этилишича, Туркия раҳбари ҳам Шавкат Мирзиёевни Наврўз байрами билан қутлаган.
«Наврўз байрами, муборак Рамазон ойи турк олами, Ислом дунёсига тинчлик ва барака олиб келади. Ота юртимизга ташриф буюрганимиздан мамнунман. Диполматик алоқаларимиз ўрнатилганига 30 йил тўлганидан хурсандман. Олти йилдан буён қардошим қатъийлик билан амалга ошираётган ислоҳотларни юксак баҳолаймиз. Бундан кейин ҳам Туркия Ўзбекистоннинг стратегик ҳамроҳи сифатида қолади», — дейди Ражаб Тоййиб Эрдўғон.
Эслатиб ўтамиз, Шавкат Мирзиёевнинг таклифига биноан Туркия президенти Ражаб Тоййиб Эрдўғон 29—30 март кунлари расмий ташриф билан Ўзбекистонда бўлиши хабар қилинганди. 29 март куни Кўксарой қароргоҳида Эрдўғонни расмий кутиб олиш маросими бўлиб ўтди.
Сўнг икки мамлакат етакчилари иштирокида Ўзбекистон—Туркия стратегик шериклик кенгашининг иккинчи йиғилиши бўлиб ўтди. Шавкат Мирзиёев мулоқот аввалида Туркия етакчиси ва халқини Наврўз байрами билан табриклаб, «етакчи турк компаниялар билан аниқ лойиҳалар сонини кўпайтириш ниятида» эканини айтиб ўтди.
Шунингдек, Шавкат Мирзиёев таълим соҳасида ҳамкорлик давом эттирилиб, мамлакатда янги университетлар иш бошлашини айтиб ўтган. «Ўтган йили Анқара ва Истанбул шаҳарларида Ўзбекистон маданият кунлари муваффақиятли ўтказилди. Жорий йилда Тошкент ва Самарқанд шаҳарларида Туркия маданият кунларини ўтказишни таклиф қиламан», — дейди Ўзбекистон президенти.
Изоҳ (0)