Туркия президенти Ражаб Тоййиб Эрдўғон 29 март куни Ўзбекистонга ташриф буюрди. Икки мамлакат етакчилари иштирокида ОАВ вакиллари учун брифинг бўлиб ўтди, деб хабар берди «Дарё» мухбири.
«Бугунги учрашувимиз дипломатик алоқаларимиз ўрнатилганига 30 йил, стратегик алоқалар ўрнатилганига 5 йил тўлганига тўғри келмоқда. Ҳозирда турк қардошларимиз биздан олисларда яшаётган бўлса-да, бизнинг тилимиз ва дилимиз бир. Президент Эрдўғон ташаббуси билан ташкил этилган Ўзбекистон—Туркия стратегик шериклик кенгаши мамлакатларимиз ўртасидаги алоқаларни янада мустаҳкамламоқда. Биз ўтказилган музокараларимиз давомида икки томоннинг ҳозирги ҳолати ва келгусидаги режалари тўғрисида фикр алмашдик», — деган Шавкат Мирзиёев.
Ўзбекистон етакчиси «музокаралар давомида сиёсий, парламентлараро, транспорт, соғлиқни сақлаш, қишлоқ хўжалиги каби соҳаларда фикр алмашилганини» қайд этган.
«Қардошим билан Сирдарё вилоятининг Ховос туманида иссиқлик электр станцияси қурилиши бошланишига бағишланган маросимда иштирок этдик. Бугунги имзоланган қўшма баёнот, имтиёзли савдо тўғрисида, шунингдек, мудофаа, адлия каби соҳаларда битимлар имзоланди. Келгуси йили Ўзбекистон—Туркия стратегик шериклик кенгашининг учинчи йиғилишини ўтказиш учун Туркияга боришни режалаштирганмиз. Бундан ташқари, эртага Хива шаҳрига бориб, тарихий шаҳарни кўрамиз», — дея қўшимча қилди Шавкат Мирзиёев.
Эслатиб ўтамиз, Шавкат Мирзиёевнинг таклифига биноан Туркия президенти Ражаб Тоййиб Эрдўғон 29—30 март кунлари расмий ташриф билан Ўзбекистонда бўлиши хабар қилинганди. 29 март куни Кўксарой қароргоҳида Эрдўғонни расмий кутиб олиш маросими бўлиб ўтди.
Сўнг икки мамлакат етакчилари иштирокида Ўзбекистон—Туркия стратегик шериклик кенгашининг иккинчи йиғилиши бўлиб ўтди. Шавкат Мирзиёев мулоқот аввалида Туркия етакчиси ва халқини Наврўз байрами билан табриклаб, «етакчи турк компаниялар билан аниқ лойиҳалар сонини кўпайтириш ниятида» эканини айтиб ўтди.
Шунингдек, Шавкат Мирзиёев таълим соҳасида ҳамкорлик давом эттирилиб, мамлакатда янги университетлар иш бошлашини айтиб ўтган. «Ўтган йили Анқара ва Истанбул шаҳарларида Ўзбекистон маданият кунлари муваффақиятли ўтказилди. Жорий йилда Тошкент ва Самарқанд шаҳарларида Туркия маданият кунларини ўтказишни таклиф қиламан», — дейди Ўзбекистон президенти.
Йиғилишда Туркия президенти Шавкат Мирзиёев амалга ошираётган ислоҳотларни юксак баҳолаб, «олти йилдан буён қардошим қатъийлик билан амалга ошираётган ислоҳотларни юксак баҳолаймиз. Бундан кейин ҳам Туркия Ўзбекистоннинг стратегик ҳамроҳи сифатида қолади», — деди.
Изоҳ (0)