Туркия президенти Ражаб Тоййиб Эрдўғон 29 март куни давлат ташрифи билан Ўзбекистонга келди. Айни вақтда икки мамлакат етакчилари иштирокида ОАВ вакиллари учун брифинг бўлиб ўтмоқда, деб хабар берди «Дарё» мухбири.
«Қардошим Шавкат Мирзиёев бошчилигида олиб бораётган ишлари таҳсинга сазовор. Биласиз, Туркия биринчи бўлиб Ўзбекистоннинг мустақиллигини тан олган, шунингдек, биринчи бўлиб ўз элчихонасини очган мамлакат ҳисобланади. Икки мамлакат ўртасидаги савдо ҳажми ўтган йили 3,6 миллиард доллардан ошди. Келгуси йилларда мазкур рақамни 5 миллиард долларга олиб чиқишни мақсад қилганмиз. Албатта, биз бу билан тўхтаб қолмаймиз. Келажакда савдо ҳажмини 10 миллиард долларга етказамиз», — дейди Туркия етакчиси.
Ражаб Тоййиб Эрдўғон Туркия компанияларининг Ўзбекистондаги фаолияти, хусусан, қурилиш соҳасидаги ишлари ҳақида гапирган.
«Туризм соҳасида ҳамкорлигимиз кучайиб бормоқда. Ўтган йили Туркияга Ўзбекистондан 270 мингдан ортиқ сайёҳ келди. Мазкур кўрсаткични келгусида 500 мингга олиб чиқиш режамиз бор. Яна бир салоҳиятли соҳа — мудофаа саноати. Бугун имзоланган битимларда ҳам мудофаа тизимини янада ривожлантиришга келишиб олдик. Шунингдек, таълим соҳасида турк—ўзбек университетлари бўйича ҳам мутасаддиларга топшириқлар бердик», — дейди Туркия президенти.
Ражаб Тоййиб Эрдўғон 30 март куни Хива шаҳрига ташриф буюришидан ҳаяжонда эканини айтиб ўтган.
Эслатиб ўтамиз, Шавкат Мирзиёевнинг таклифига биноан Туркия президенти Ражаб Тоййиб Эрдўғон 29—30 март кунлари расмий ташриф билан Ўзбекистонда бўлиши хабар қилинганди. 29 март куни Кўксарой қароргоҳида Эрдўғонни расмий кутиб олиш маросими бўлиб ўтди.
Сўнг икки мамлакат етакчилари иштирокида Ўзбекистон—Туркия стратегик шериклик кенгашининг иккинчи йиғилиши бўлиб ўтди. Шавкат Мирзиёев мулоқот аввалида Туркия етакчиси ва халқини Наврўз байрами билан табриклаб, «етакчи турк компаниялар билан аниқ лойиҳалар сонини кўпайтириш ниятида» эканини айтиб ўтди.
Шунингдек, Шавкат Мирзиёев таълим соҳасида ҳамкорлик давом эттирилиб, мамлакатда янги университетлар иш бошлашини айтиб ўтган. «Ўтган йили Анқара ва Истанбул шаҳарларида Ўзбекистон маданият кунлари муваффақиятли ўтказилди. Жорий йилда Тошкент ва Самарқанд шаҳарларида Туркия маданият кунларини ўтказишни таклиф қиламан», — дейди Ўзбекистон президенти.
Йиғилишда Туркия президенти Шавкат Мирзиёев амалга ошираётган ислоҳотларни юксак баҳолаб, «олти йилдан буён қардошим қатъийлик билан амалга ошираётган ислоҳотларни юксак баҳолаймиз. Бундан кейин ҳам Туркия Ўзбекистоннинг стратегик ҳамроҳи сифатида қолади», — деди.
Изоҳ (0)