Turkiya prezidentini Ko‘ksaroy qarorgohida rasmiy kutib olish marosimi bo‘lib o‘tdi

Shavkat Mirziyoyevning taklifiga binoan Turkiya prezidenti Rajab Toyyib Erdo‘g‘on rasmiy tashrif bilan O‘zbekistonga keldi. Bu haqda “Daryo” muxbiri xabar bermoqda.

Turkiya yetakchisi rafiqasi Emine Erdo‘g‘an, shuningdek, adliya vaziri Bekir Bozdag‘, milliy mudofaa vaziri Hulusi Akar, mehnat va ijtimoiy xavfsizlik vaziri Vedat Bilgin, sog‘liqni saqlash vaziri Fahrettin Koja, savdo vaziri Mehmet Mush, prezidentlik aloqa direktori Fahrettin Altun va prezident mudofaa sanoati rahbari Ismoil Demir ham Toshkentga keldi.

Turkiya prezidenti Shavkat Mirziyoyev hamrohligida “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi.

Ko‘ksaroy qarorgohida oliy martabali mehmonni rasmiy kutib olish marosimi bo‘lib o‘tdi.

Marosimda saf tortgan faxriy qorovulni yangi liboslarda ko‘rish mumkin.

Rajab Toyyib Erdo‘g‘on tashrif doirasida oliy darajadagi O‘zbekiston—Turkiya strategik sheriklik kengashining ikkinchi yig‘ilishida ishtirok etishi kutilmoqda.

O‘zbekiston va Turkiya yetakchilari o‘tkazadigan muzokaralarning kun tartibidan ikki tomonlama do‘stlik va strategik sheriklik munosabatlarini yanada rivojlantirish va mustahkamlash, ikki mamlakat o‘rtasidagi ko‘p qirrali hamkorlikni kengaytirish masalalari o‘rin olgan.

Shuningdek, xalqaro va mintaqaviy siyosatning dolzarb jihatlari yuzasidan fikr almashiladi.

Sammit yakunida qo‘shma bayonot va qator ikki tomonlama hujjatlar qabul qilinishi rejalashtirilgan.