“Yetakchi turk kompaniyalar bilan aniq loyihalar sonini ko‘paytirish niyatidamiz” — Shavkat Mirziyoyev

Turkiya prezidenti Rajab Toyyib Erdo‘g‘on O‘zbekistonda bo‘lib turibdi. Ayni vaqtda ikki mamlakat yetakchilari ishtirokida O‘zbekiston—Turkiya strategik sheriklik kengashining ikkinchi yig‘ilishi bo‘lib o‘tmoqda, deb xabar bermoqda “Daryo” muxbiri.

Qayd etilishicha, Shavkat Mirziyoyev muloqot avvalida Turkiya yetakchisi va xalqini Navro‘z bayrami bilan tabriklagan. O‘zbekiston prezidenti Toshkentda birinchilardan bo‘lib Turkiya elchixonasi ochilganini alohida qayd etib, “buni qadrlashini” aytgan.

“Tor doiradagi uchrashuvimizda barcha masalalarda qarashlarimiz bir xil ekanini ko‘rsatdi, shuningdek, erishilgan yutuqlarni alohida e’tirof etdik. Oliy darajada kelishilgan masalalarning barchasini amalga oshirishni kelishib oldik. Biz kelajakda katta loyihalarni birga amalga oshirishdan manfaatdormiz. Logistika va aviaqatnovlarni kengaytirishimiz lozim. Turkiyaning yetakchi kompaniyalari bilan to‘qimachilik, turizm, farmatsevtika, qurilish kabi sohalarda birga yangi loyihalarni amalga oshirishimiz zarur. Bundan tashqari yetakchi turk kompaniyalar bilan aniq loyihalar sonini ko‘paytirish niyatidamiz. O‘zbekistonda turli sohalarda loyihalarni amalga oshirishda turkiyalik mutaxassislar ko‘maklashmoqda”, — dedi Shavkat Mirziyoyev.

Eslatib o‘tamiz, Shavkat Mirziyoyevning taklifiga binoan Turkiya prezidenti Rajab Toyyib Erdo‘g‘on 29—30-mart kunlari rasmiy tashrif bilan O‘zbekistonda bo‘lishi xabar qilingandi. 29-mart kuni Ko‘ksaroy qarorgohida Erdo‘g‘onni rasmiy kutib olish marosimi bo‘lib o‘tdi.