Turkiya prezidenti Rajab Toyyib Erdo‘g‘on 29-mart kuni O‘zbekistonga tashrif buyurdi. Ikki mamlakat yetakchilari ishtirokida OAV vakillari uchun brifing bo‘lib o‘tdi, deb xabar berdi “Daryo” muxbiri.
“Bugungi uchrashuvimiz diplomatik aloqalarimiz o‘rnatilganiga 30 yil, strategik aloqalar o‘rnatilganiga 5 yil to‘lganiga to‘g‘ri kelmoqda. Hozirda turk qardoshlarimiz bizdan olislarda yashayotgan bo‘lsa-da, bizning tilimiz va dilimiz bir. Prezident Erdo‘g‘on tashabbusi bilan tashkil etilgan O‘zbekiston—Turkiya strategik sheriklik kengashi mamlakatlarimiz o‘rtasidagi aloqalarni yanada mustahkamlamoqda. Biz o‘tkazilgan muzokaralarimiz davomida ikki tomonning hozirgi holati va kelgusidagi rejalari to‘g‘risida fikr almashdik”, — degan Shavkat Mirziyoyev.
O‘zbekiston yetakchisi “muzokaralar davomida siyosiy, parlamentlararo, transport, sog‘liqni saqlash, qishloq xo‘jaligi kabi sohalarda fikr almashilganini” qayd etgan.
“Qardoshim bilan Sirdaryo viloyatining Xovos tumanida issiqlik elektr stansiyasi qurilishi boshlanishiga bag‘ishlangan marosimda ishtirok etdik. Bugungi imzolangan qo‘shma bayonot, imtiyozli savdo to‘g‘risida, shuningdek, mudofaa, adliya kabi sohalarda bitimlar imzolandi. Kelgusi yili O‘zbekiston—Turkiya strategik sheriklik kengashining uchinchi yig‘ilishini o‘tkazish uchun Turkiyaga borishni rejalashtirganmiz. Bundan tashqari, ertaga Xiva shahriga borib, tarixiy shaharni ko‘ramiz”, — deya qo‘shimcha qildi Shavkat Mirziyoyev.
Eslatib o‘tamiz, Shavkat Mirziyoyevning taklifiga binoan Turkiya prezidenti Rajab Toyyib Erdo‘g‘on 29—30-mart kunlari rasmiy tashrif bilan O‘zbekistonda bo‘lishi xabar qilingandi. 29-mart kuni Ko‘ksaroy qarorgohida Erdo‘g‘onni rasmiy kutib olish marosimi bo‘lib o‘tdi.
So‘ng ikki mamlakat yetakchilari ishtirokida O‘zbekiston—Turkiya strategik sheriklik kengashining ikkinchi yig‘ilishi bo‘lib o‘tdi. Shavkat Mirziyoyev muloqot avvalida Turkiya yetakchisi va xalqini Navro‘z bayrami bilan tabriklab, “yetakchi turk kompaniyalar bilan aniq loyihalar sonini ko‘paytirish niyatida” ekanini aytib o‘tdi.
Shuningdek, Shavkat Mirziyoyev ta’lim sohasida hamkorlik davom ettirilib, mamlakatda yangi universitetlar ish boshlashini aytib o‘tgan. “O‘tgan yili Anqara va Istanbul shaharlarida O‘zbekiston madaniyat kunlari muvaffaqiyatli o‘tkazildi. Joriy yilda Toshkent va Samarqand shaharlarida Turkiya madaniyat kunlarini o‘tkazishni taklif qilaman”, — deydi O‘zbekiston prezidenti.
Yig‘ilishda Turkiya prezidenti Shavkat Mirziyoyev amalga oshirayotgan islohotlarni yuksak baholab, “olti yildan buyon qardoshim qat’iylik bilan amalga oshirayotgan islohotlarni yuksak baholaymiz. Bundan keyin ham Turkiya O‘zbekistonning strategik hamrohi sifatida qoladi”, — dedi.
Izoh (0)