Ўзбекистон товар-хом ашё биржасида шакарнинг нархи 23 мартдан бери пасайишда давом этмоқда. Бу ҳақда биржа матбуот хизмати хабар берди.
2022 йил 25 мартда ўтказилган очиқ биржа савдо натижаларига кўра шакарнинг барча категорияси бўйича шаклланган ўртача кунлик нархи аввалги савдо кунига нисбатан маҳсулотнинг бир тоннаси учун 8,73 млн сўмдан 8,56 млн сўмгача, яъни 2 фоизга пасайган.
Сўнгги икки кун давомида биржада шакарни харид қилиш бўйича Тошкент шаҳри ва Тошкент вилояти (33 фоиз), Самарқанд (15 фоиз), Қашқадарё (12 фоиз), Фарғона (8 фоиз) ва Андижон (7 фоиз) вилоятлари етакчилик қилди.
Шакарнинг биржадаги нархи пасайишига бозор воситаларининг қўлланиши, жумладан, биржанинг шакар сегментида таклиф даражаси оширилиши ҳисобига эришилди.
Хусусан, 24 мартда биржа савдоларига жами 3 200 тонна шакар қўйилган бўлиб, улардан 2874 тоннаси, яъни 90 фоизи сотилди. Бунда, биржа савдолари орқали «Хоразм шакар» МЧЖ томонидан 1 600 тонна ва «Ангрен шакар» МЧЖ томонидан 1 274 тонна шакар сотилди.
Аввалроқ Украина мамлакат ҳудудида шакар экспортини тақиқлагани ҳақида хабар берилган эди. Яқин кунларда худди шундай қарор Россия томонидан ҳам қабул қилинади. Бундан кейин биржада шакар нархлари қимматлашди.
Изоҳ (0)