Андижон шаҳрида 22 март куни меҳмонга келган танишлар ўртасидаги жанжалда бир киши ҳалок бўлди. Бу ҳақда Тергов департаменти хабар қилди.
Қайд этилишича, шу куни А.Р. (50 ёшли) ҳамда Б.А. (53 ёшли) шаҳарнинг «Исломобод» маҳалласида жойлашган М.М.нинг (53 ёшли) яшаш хонадонига меҳмонга келган. У ерда биргаликда спиртли ичимликлар истеъмол қилиб, А.Р. ҳамда Б.А. маст ҳолда бир-бирини ҳақорат қилган. Ўртада жанжал келиб чиқиб, Б.А. стол устида турган хўжалик пичоғи билан А.Р.нинг кўкрак соҳасига бир маротаба уриб тан жароҳати етказган. Оқибатда А.Р. ҳодиса жойида вафот этган.
Суд-тиббий экспертиза хулосасида А.Р.да кўкрак қафаси ўнг томон соҳасидан кўкрак бўлиғига тешиб ўтувчи санчма кесма жароҳат аниқланган. Мазкур жароҳат оғирлик даражасига кўра, ҳаёт учун хавфли бўлган оғир тан жароҳатлари сифатида баҳоланиши кўрсатилган.
Ҳолат юзасидан Б.А.га нисбатан Жиноят кодекснинг 104-моддаси 3-қисми «д» банди (жабрланувчининг ўлишига сабаб бўладиган қасддан баданга оғир шикаст етказиш) билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)