Олий Мажлис Сенати Россия ва Украина муаммоларини тинчлик йўли билан ҳал қилиши тарафдори. Бу ҳақда 17 март куни бўлиб ўтган Сенатнинг навбатдаги ялпи мажлисида Мудофаа ва хавфсизлик масалалари қўмитаси раиси Қутбиддин Бурҳонов «Дарё» мухбирига берган қисқача интервьюсида айтиб ўтди.
Ялпи мажлисда ташқи ишлар вазири Абдулазиз Комилов Россия ва Украина ўртасидаги вазиятга муносабат билдирган эди. Вазир ўз чиқишида: «Украина атрофидаги вазият Ўзбекистонда жиддий хавотир уйғотмоқда. Биз бу масаланинг тинч йўл билан ҳал қилиниши тарафдоримиз. Бунинг учун биринчи навбатда ҳарбий ҳаракатлар, зўравонликлар зудлик билан тўхтатилиши зарур», — дея таъкидлаган.
Қутбиддин Бурҳонов ташқи ишлар вазирининг чиқишига муносабат билдирар экан, Ўзбекистоннинг олиб бораётган сиёсати — бу тинчлик сиёсати эканлигини таъкидлаб ўтди.
«Ўзбекистон фуқаролари бугунги кунда Россия Федерациясига бориб ишламоқда, тирикчилигини қилмоқда ва оиласини боқмоқда. Украинага нисбатан ҳам бизнинг ҳурматимиз жуда юқори. Мустақил, суверен давлат. Кўп фарзандларимиз олий ўқув юртларида ўқиётган эди. Давлат ташкилотлари ва корхоналарида ишлаётганлар бор эди. Украина билан иқтисодий муносабатимиз ҳам жуда яхши эди. Биз ҳам сенатор сифатида ташқи ишлар вазири айтганидек, ҳар икки давлат, барча муамоларини тинчлик йўли билан ҳал қилиши тарафдоримиз», — деди сенатор.
Эслатиб ўтамиз, 24 февралга ўтар кечаси Россия президенти Владимир Путин Донбассда «минтақа аҳолисини геноциддан ҳимоя қилиш» учун «махсус ҳарбий операция» бошланганини эълон қилган эди. Ўзбекистон президентининг матбуот котиби Шерзод Асадов Шавкат Мирзиёев 25 февраль куни Владимир Путин билан телефон орқали мулоқот қилгани юзасидан берган қўшимча маълумотида Ўзбекистон бу масала бўйича вазмин, нейтрал позицияда эканлигини маълум қилганди.
Изоҳ (0)