Коррупцияга қарши курашиш агентлиги Бухоро вилояти Соғлиқни сақлаш бошқармасидаги қонун бузилиш ва коррупциявий ҳолатлар юзасидан «Дарё»га маълумот берди.
Қайд этилишича, февраль ойида тизимда кадрлар сиёсатининг қанчалик тўғри ташкил этилгани ўрганилган ва ушбу йўналишда бир қатор муаммо ва камчиликлар аниқланган. Вилоят соғлиқни сақлаш бошқармаси ва унинг таркибидаги муассасаларда жами 40 минг 163 нафар тиббиёт ходими фаолият юритади. Шундан 2020—2021 йилларда 1 минг 984 нафар соҳа ходимига нисбатан турли шаклдаги қонун бузилиши ва коррупциявий ҳолатлар юзасидан хизмат текширувлари ўтказилган.
Шунингдек, касбий вазифаларини лозим даражада бажармаган ва сусткашликка йўл қўйган 2 минг 575 нафар ходим билан тузилган меҳнат шартномалари бекор қилинган. Шу муддат оралиғида 2 минг 651 нафар тиббиёт ходимлари интизомий жавобгарликка тортилган.
Вилоятда тиббиёт муассасалари ходимлари томонидан 2020 йилда 12 та, 2021 йилда 16 та ҳолатда пора эвазига ишга қўйиш учун тамагирлик жиноятлари содир этилган. Масалан, Шофиркон тумани тиббиёт бирлашмасида кадрлар бўлими мансабдори 1998 йилдан (23 йилдан) буён ишлаб келаётган бўлиб, ушбу мансабдор томондан 2020 ва 2021 йилларда бирлашмада тамагирлик эвазига ишга жойлаштириш билан боғлиқ 2 та жиноят содир этилган.
Бундан ташқари, вилоят тери-таносил касалликлари диспансерида кадрлар бўлими бошлиғи 1994 йилдан (27 йилдан) бери ишлаб келаётган бўлиб, ушбу муассасада ҳам тамагирлик эвазига ишга жойлаштириш билан боғлиқ 2 та жиноят содир этилган.
Кадрлар сиёсатида коррупциявий ҳолатларни келтириб чиқарувчи омиллардан яна бири аксарият тиббиёт муассасаларида меҳнат қонунчилиги талабларига зид равишда яқин қариндош-уруғларнинг ўзаро бўйсунув асосида хизмат қилиб келаётганлигидир. Жумладан, 493 та ҳолатда тиббиёт муассасада ўзаро қариндошлар фаолият юритаётган бўлса, шундан 214 та ҳолатда муассаса раҳбариятига бевосита бўйсуниб ёки унинг назорати остида хизмат қилаётгани маълум бўлди. Мисол учун, вилоят руҳий-асаб касалликлари диспансерида 18 нафар ўзаро қариндошлар биргаликда ишлаб келмоқда. Бу каби ҳолатлар деярли барча тиббиёт муассасаларида кузатилмоқда.
Юзага келаётган коррупцион ҳолатлар тиббиёт муассасаларида бўш иш ўринлари (вакансия)ни очиқламаслик, улар тўғрисидаги маълумотларни ўз вақтида кенг жамоатчиликка етказмаслик билан ҳам боғлиқ ҳисобланади. Жумладан, 2020—2021 йилларда тизимда бўш иш ўринларини яшириш билан боғлиқ 33 та қонун бузилиш ҳолатлари аниқланган. Биргина ўтган йилда тиббиёт муассасаларида ишга олиш билан боғлиқ 13 та жиноят содир қилинган. Таҳлил қилинганда 7 та ҳолатда муассасада аслида бўш иш ўринлари мавжуд бўлган.
Мавзуга доир:
Изоҳ (0)