Украинадаги жанговар ҳаракатларда 20 кун ичида 7000 дан ортиқ россиялик ҳарбий ҳалок бўлди. Бу Ироқ ва Афғонистондаги 20 йиллик урушлар давомида ҳалок бўлган америкалик аскарларнинг умумий сонидан кўп, деб ёзади The New York Times Америка разведкасининг «консерватив ҳисоб-китобларига» таяниб.
Газетанинг ёзишича, яна 14—21 минг рус аскари яраланган. Нашр маълумотларига кўра, урушда Россия томондан жами 150 мингдан ортиқ ҳарбий хизматчи қатнашмоқда.
Пентагон расмийларининг таъкидлашича, кўп ва ортиб бораётган қурбонлар Россия армиясининг руҳий ҳолатига путур етказиши мумкин.
Шу билан бирга, NYT манбалари қурбонлар ҳақида уларнинг қўлидаги маълумотлар нотўғри бўлиши мумкинлигини таъкидлади. Улар ОАВ таҳлили, сунъий йўлдош тасвирлари, ўққа тутилган рус аскарлари ва техникаларининг суратлари, шунингдек, томонларнинг расмий маълумотлари асосида тузилган. Расмий маълумотларда эса Украина томони йўқотишларни ошириб, Россия камайтириб кўрсатган бўлиши мумкин.
Россия Мудофаа вазирлиги уруш бошланганидан бери йўқотишлари ҳақида фақат бир марта эълон қилди. 2 март куни вазирлик Украинада 498 нафар россиялик ҳарбий ҳалок бўлганини, яна 1597 киши яраланганини маълум қилган.
Украина томонининг сўнгги ҳисоб-китобларига кўра, Россия армиясининг йўқотишлари 13,8 минг кишини ташкил қилади. Шу билан бирга, гап фақат ўлганлар ҳақидами ёки ярадорлар ва маҳбуслар ҳам қўшиб ҳисобланганми, аниқлик киритилмаган.
Украина расмийлари, шунингдек, уруш пайтида тўрт нафар россиялик генерал ҳалок бўлганини эълон қилди. Россия бу маълумотларни тасдиқламади. NYT манбаларининг таъкидлашича, кўплаб россиялик генераллар ҳимояланмаган телефонлар ва рацияларда гаплашади. Генераллардан камида бир нафари Украина разведкаси унинг қўнғироқларини тутиб, жойлашган жойини топгач, ўлдирилган.
Уруш пайтида ҳатто низо иштирокчиларининг расмий вакиллари тарқатаётган маълумотни ҳам текшириш имконсиз.
Изоҳ (0)