Ижтимоий тармоқларда Қорақалпоғистонда ЙПХ ходимига қўпол муносабатда бўлиб, уларни ҳақорат қилган йўл ҳаракати хавфсизлиги бошқармаси масъулининг видеоси тарқалди. Қорақалпоғистон Республикаси ИИВ видеодаги ҳолат юзасидан маълумот бериб, тасвирлар 2021 йилнинг февралига тегишли эканини маълум қилди.
Видеода Қорақалпоғистон Ички ишлар вазирлиги Йўл ҳаракати хавфсизлиги бошқармаси бошлиғи вазифасини бажарувчи капитан Б.Хўжанов маъмурий баённомалар кам тузилгани учун қўл остидаги ходимларни ҳақоратлаб, ургани тасвирланган.
Вазирлик маълумотларига кўра, видеотасвирдаги ҳолат, 2021 йилнинг 14 февраль куни содир бўлган. Бу бўйича Йўл ҳаракати хавфсизлиги бошқармаси бошлиғи вазифасини бажарувчиси капитан Б.Хўжановга нисбатан тегишли тартибда хизмат текшируви тайинланган.
«Вазирликнинг тегишли соҳавий хизматлари томонидан ўтказилган хизмат текшируви якуни бўйича, капитан Б.Хўжанов қўл остидаги ходимларга қўпол муносабатда бўлгани ҳамда хизматда камчиликларга йўл қўйгани учун ‘лавозим маошининг 30 фоизи миқдорида ушлаб қолиш’ қаттиқ интизомий жазо чораси қўлланилган», — дейилади муносабатда.
Аввалроқ Қашқадарёда ЙПХ ходимлари билан жанжаллашган ҳайдовчи 14 суткага қамалгани, Самарқандда ҳайдовчининг телефонини тортиб олишга уринган ЙҲХБ ходимига хизмат текшируви тайинлангани тўғрисида хабар берилганди.
Изоҳ (0)