Мисрдан учган самолёт ҳам туман сабабли Тошкент аэропортига қўна олмади

16 март куни эрта тонгдан Тошкент аэропорти ҳудудида кузатилган ноқулай об-ҳаво шароити — қуюқ туман сабаб бир қатор рейслар учиш ва қўнишни амалга ошира олмади, деб хабар беради Uzbekistan Airports матбуот хизмати.

Ноқулай об-ҳаво шароити туфайли — кўриш масофаси 200 метр атрофида — Air Cairo авиакомпаниясининг Шарм-аш-Шайх—Тошкент йўналиши бўйича учган бортида 172 нафар йўловчи бор самолёти соат 09:35 да Навоий аэропортига қўнди.

Олдинроқ Тошкент аэропортидаги кучли туман туфайли Turkish Airlines авиакомпаниясининг Истанбулдан парвоз қилган ТHY-368 рейси белгиланган аэропортга қўна олмай, соат 08:45 да Бишкекдаги (Қирғизистон) захира аэродромига йўналтирилган эди.

Маълум қилинишича, Тошкент вақти билан соат 10:14 да пойтахт аэропортидаги чекловлар олиб ташланган. Ҳозирда кўриш масофаси 2000 метр атрофида. Turkish Airlines авиакомпаниясининг ТHY-368 рейси Тошкентга 11:47 да, Air Cairo самолёти эса 12:07 да келиб қўнган.

Эслатиб ўтамиз, январь охирларида Тошкент ва Истанбул ўртасидаги қатор авиапарвозлар кучли қор сабаб бекор қилинган, Истанбулдан Урганчга келаётган рейс ноқулай об-ҳаво туфайли Тошкентга йўналтирилган эди.