Сирдарё туманидаги хўжаликлараро коллекторнинг Бахт шаҳарчаси ҳудудидан оқиб ўтувчи қисмида сув сатҳининг меъёридан ошиб кетиши оқибатида хонадонларга сув тошиб кирди, деб хабар беради ФВВ матбуот хизмати.
Маълум қилинишича, сурункали ёғингарчиликлар туфайли Сирдарё вилояти Сирдарё туманидаги хўжаликлараро коллекторнинг Бахт шаҳарчаси ҳудудидан оқиб ўтувчи қисмида сув сатҳининг меъёридан ошиб кетган. Оқибатда қишлоқ хўжалигининг шудгор ерларига, маҳаллалар ва аҳоли яшаш хонадонларига, хусусан, Бахт шаҳри «Хазина» МФЙнинг Хамиятли кўчасида 21 та, Тароватли кўчасида 7 та, Улуғ йўл кўчасида 35 та, Пешқадам кўчасида 12 та, Янги қурилиш кўчасида 27 та хонадонга сув кирган.
Зудлик билан вазият оқибатларини бартараф этиш мақсадида Бахт шаҳри ИИБда тезкор штаб ташкил этилиб, туман ҳокимлиги, ФВБ, ИИБ, Миллий гвардия ходимлари ва маҳалла вакилларидан иборат 3 та ишчи гуруҳ тузилган. Ишчи гуруҳ томонидан сув тошган хонадонлар аҳолисини хавфсиз ҳудудларга кўчириш ҳақида огоҳлантириш хатлари берилиб, «Хазина» МФЙдан 20 та хонадонда яшовчи 68 нафар фуқаро вақтинчалик яқин қариндошлари хонадонларига кўчирилган. Кўчирилган аҳоли учун тиббий ва бошқа таъминот тадбирлари ташкил этилган.
Юзага келган сув тошиш оқибатларини бартараф этиш учун вилоят Фавқулодда вазиятлар бошқармаси, «Автойўл» хизмати, Сув хўжалиги вазирлиги вилоят тузилмалари куч ва воситалари жалб қилинган.
Шунингдек, воқеа жойига Фавқулодда вазиятлар вазири бошчилигида Махсус вазифалар бўйича республика қутқарув марказидан қутқарувчилар етиб борган. Жиззах ва Тошкент вилоятлари ФВБларидан қўшимча куч ва воситалар сафарбар этилиб, ҳозирда сувни чиқариш ишлари олиб борилмоқда.
Фавқулодда вазиятлар вазири генерал майор Абдулла Қўлдошев вилоятга етиб борган бўлиб, айни вақтда унинг бошчилигида кучли ёғингарчилик оқибатларини бартараф этиш ишлар амалга ошириляпти.
