Фарғона шаҳридаги «Само» спорт мажмуасида қўл жанги бўйича Ўзбекистон кубоги мусобақалари ўтказилди, дея хабар берди «Дарё» мухбири.
Мусобақада 2000—2006 йилларда туғилган ўсмирлар, ўсмир қизлар ва профессионал спортчилар ғолиблик учун беллашди.
Мусобақа Спортни ривожлантириш вазирлиги, Фарғона вилояти ҳокимлиги, Давлат хавфсизлик хизмати ҳамкорлигида ташкил этилди.
Кубок баҳсларида Қорақалпоғистон Республикаси, Тошкент шаҳри ва республиканинг барча вилоятларидан келган 763 нафар спортчи иштирок этди.
Мусобақада 21 та жамоа таркибига кирган яккакураш усталари 42 вазн тоифаси бўйича ўз имкониятларини синовдан ўтказди.
Мусобақа низомига кўра, 14-15 ёшли ўсмирлар саккизта вазн тоифасида, ўсмир қизлар олтита вазн тоифасида ғолиблик учун курашди.
Шунингдек, 18 ёшдан катта бўлган спортчилар орасидан ҳам энг кучлилар сараланди. Профессионаллар ўртасидаги баҳсларда эса 57, 62, 67 ҳамда 73 килограмм вазн тоифалари бўйича ғолиблар аниқланди.
Тўртта олтин, учта кумуш ва учта бронза медални жамғарган Фарғона вилояти спортчилари умумжамоа ҳисобида биринчи ўринни қўлга киритди. Бухоро вилояти жамоаси иккинчи, наманганлик қўл жанги усталари эса учинчи ўринни эгаллади.
Ўзбекистон ҳуқуқни муҳофаза қилиш идоралари ходимлари ўртасида ўтказилган баҳсларда Миллий гвардия жамоаси ғолиб бўлди. Ички ишлар вазирлиги ва Давлат хавфсизлик хизмати жамоалари кейинги ўринларни банд қилди.
Изоҳ (0)