Ўзбекистон ва Туркия ўртасида эмланганлик сертификатларини ўзаро тан олиш келишувига эришилди, деб хабар бермоқда Telegram’даги «Vaksina.uz» канали.
Қайд этилишича, Ўзбекистон ва Туркия томонлари миллий даражада COVID-19 вирусига қарши курашиш борасида амалга оширилаётган чора-тадбирларни муҳокама қилган. Ҳукуматлар ўз ҳудудини коронавируснинг кириб келиши ва тарқалишидан юқори даражада ҳимоя қилиш юзасидан кўрилаётган қатъий талаблар муҳимлигини таъкидлаган ва бир қатор масалаларда келишиб олган.
Жумладан, икки давлат ваколатли органлар томонидан берилган COVID-19 вирусига қарши эмланганликни тасдиқловчи расмий сертификатларни ўзаро тан олади. Томонлар эмланганлик тўғрисидаги сертификат эгасига мамлакат ҳудудига вирус тарқалишини олдини олишга қаратилган чекловларсиз киришни кафолатлайди.
Миллий даражада ёки ЖССТ томонидан тасдиқланган вакциналар билан тўлиқ эмланган икки мамлакатдан келган саёҳатчилар, агар эмлаш тегишли ваколатли органлар томонидан тасдиқланган бўлса, ўз мамлакатларига киришда ушбу қоидалардан фойдаланади.
Аввалроқ 14 март куни Ўзбекистонга COVAX дастури доирасида 1 миллион 999 минг 530 доза Pfizer/BioNTech вакцинаси келтирилгани хабар қилинганди. Бу орқали мамлакатда фойдаланилаётган вакциналар миқдори 61 миллион 268 минг 553 дозага етди.
Эслатиб ўтамиз, Россия Ўзбекистон ва бошқа бир қатор давлатлар билан коронавирус сабабли ҳаво қатновига қўйилган чекловларни бекор қилган. 9 мартдан бошлаб мунтазам бўлмаган ва мунтазам рейслар қатновига рухсат берилган.
Шунингдек, Саудия Арабистони подшоҳлиги мамлакатга келувчи йўловчилар учун COVID-19 билан боғлиқ баъзи чекловларга ўзгартириш киритган. Саудияга сафар қиладиган зиёратчилар учун ПЗР-тест маълумотини тақдим этиш тартиби бекор қилинган.
Ўзбекистон ва Қозоғистон ўртасида 16 мартдан икки томонлама мунтазам халқаро автобус йўналишларида қатновлар қайта тикланади. Халқаро автобус қатновлари коронавирус пандемияси сабабли 2020 йил 16 март куни тўхтатилган эди.
Изоҳ (0)