Saudiya Arabistoni podshohligi Aviatsiya boshqarmasi “GACA” mamlakatga keluvchi yo‘lovchilar uchun COVID-19 bilan bog‘liq ba’zi cheklovlarga o‘zgartirish kiritdi. Bu haqda Din ishlari bo‘yicha qo‘mita xabar qildi.
Qayd etilishicha, endilikda koronavirus mavjud emasligi haqidagi manfiy natijaga ega bo‘lgan QR-kodli PZR-test ma’lumotini Saudiya Arabistoniga kirishda taqdim etish tartibi bekor qilinadi. Umra-2022 mavsumida mamlakatga safar qilayotgan ziyoratchilar uchun safardan oldin olinadigan PZR-test ma’lumotini taqdim etish talab etilmaydi.
Umra dasturida safar qiluvchi ziyoratchilar koronavirusga qarshi quyidagi vaksinalardan biri bilan emlangan bo‘lishi talab etiladi:
- Pfizer/BioNTech;
- Oxford-AstraZeneca;
- Moderna;
- Johnson & Johnson.
Avvalroq O‘zbekistonda Umra ziyorati qachondan boshlanishi va uning narxlari haqida ma’lumot berilgandi. Unda 2020-yil fevral oyiga qadar Umra ziyorati uchun oxirgi belgilangan to‘lovlarni amalga oshirganlar qo‘shimcha ravishda 4 770 000 so‘m mablag‘ to‘lashi ham keltirib
o‘tilgan edi. Ijtimoiy tarmoqlarda ushbu qo‘shimcha to‘lov borasida turli mulohazalar bildirilganidan so‘ng, Musulmonlar idorasi holatga izoh berib, koronavirus pandemiyasi Umra xizmatlari ko‘rsatishga ham salbiy ta’sir ko‘rsatganini
ma’lum qildi. Qayd etilishicha, mehmonxonada 4 kishilik xonaga 2 nafar ziyoratchi, 50 o‘rindiqli avtobusga 25 kishi joylashtirish kabi talablar o‘rnatilgan. 22-yanvar kuni erta tongda Umra—2022 mavsumining ilk ziyoratchilari Toshkent xalqaro aeroportidan Saudiya Arabistoniga
jo‘nab ketgandi.
Eslatib o‘tamiz, Saudiya Arabistoni hukumati chet elliklar kichik haj — Umra ziyoratini amalga oshirish uchun 10-avgustdan qirollikka kirishi mumkinligini
e’lon qilgan edi. Ziyoratchilar qirollikda tasdiqlangan Pfizer, Moderna, Johnson & Johnson, AstraZeneca vaksinalaridan biri bilan emlangan bo‘lishi yoki manfiy javobli PZR-testni taqdim etishi kerak edi.
