А-373 Тошкент—Ўш автойўлининг Қамчиқ довони ҳудудида 15—18 март кунлари кучли ёғингарчилик кузатилади. Бу ҳақда Фавқулодда вазиятлар вазирлиги хабар қилди.
Қайд этилишича, шу кунлари ҳудудда вақти-вақти билан кучли ёғингарчилик, туман тушиши кузатилади. Кўрувчанлик 50 метргача пасайиши, шамол тезлиги 20—23 метр/секундгача кучайиши, йўлларда қор уюмлари юзага келиши мумкин бўлади.
«Фавқулодда вазиятлар вазирлиги ҳайдовчилардан хавфсизлик қоидаларига риоя қилишни сўраб қолади», — дейилади хабарда.
Аввалроқ «Ўзгидромет» ҳафта давомида (14—20 март кунлари) кузатиладиган об-ҳаво ҳақида маълумот берганди. Унга кўра, ҳафта охирларига бориб ёмғир ёғиб, айрим жойларда қорга айланиши мумкин.
Республика Гидрометеорология марказининг 15 март, сешанба куни учун об-ҳаво прогнозида тоғли ҳудудларда ҳаво ўзгариб туриши, вақти-вақти билан ёғингарчилик (ёмғир, қор) кузатилиши, момақалдироқ бўлиши айтилганди.
«Ўзгидромет» прогнозига кўра, ҳафта охирларига бориб айрим жойларда ёмғир қорга айланиши мумкин. Вақти-вақти билан ёмғир ёғиши кузатиладиган беқарор об-ҳаво кейинги ҳафтанинг биринчи ярмигача сақланиб туради. Айрим вилоятларда кучли шамол ва момақалдироқ бўлиши мумкин.
Эслатиб ўтамиз, 12 март куни Қамчиқ довонидаги икки туннел орасида жойлашган ҳудудда бир кеча-кундузда жуда кўп ёғингарчиликдан ҳосил бўлган сув оқими автомобиль йўлининг остки қисмини ўпириб туширган. Шунингдек, Тахтақорача довонида 13 март куни кучли ёмғир ёғиши оқибатида М-39 автомобиль йўлининг 1138–1141-километрида қисман ўпирилиш юзага келиб, транспорт воситаларининг ҳаракати вақтинча чекланган.
Изоҳ (0)