O‘zbekiston va Turkiya o‘rtasida emlanganlik sertifikatlarini o‘zaro tan olish kelishuviga erishildi, deb xabar bermoqda Telegram’dagi “Vaksina.uz” kanali.
Qayd etilishicha, O‘zbekiston va Turkiya tomonlari milliy darajada COVID-19 virusiga qarshi kurashish borasida amalga oshirilayotgan chora-tadbirlarni muhokama qilgan. Hukumatlar o‘z hududini koronavirusning kirib kelishi va tarqalishidan yuqori darajada himoya qilish yuzasidan ko‘rilayotgan qat’iy talablar muhimligini ta’kidlagan va bir qator masalalarda kelishib olgan.
Jumladan, ikki davlat vakolatli organlar tomonidan berilgan COVID-19 virusiga qarshi emlanganlikni tasdiqlovchi rasmiy sertifikatlarni o‘zaro tan oladi. Tomonlar emlanganlik to‘g‘risidagi sertifikat egasiga mamlakat hududiga virus tarqalishini oldini olishga qaratilgan cheklovlarsiz kirishni kafolatlaydi.
Milliy darajada yoki JSST tomonidan tasdiqlangan vaksinalar bilan to‘liq emlangan ikki mamlakatdan kelgan sayohatchilar, agar emlash tegishli vakolatli organlar tomonidan tasdiqlangan bo‘lsa, o‘z mamlakatlariga kirishda ushbu qoidalardan foydalanadi.
Avvalroq 14-mart kuni O‘zbekistonga COVAX dasturi doirasida 1 million 999 ming 530 doza Pfizer/BioNTech vaksinasi keltirilgani xabar qilingandi. Bu orqali mamlakatda foydalanilayotgan vaksinalar miqdori 61 million 268 ming 553 dozaga yetdi.
Eslatib o‘tamiz, Rossiya O‘zbekiston va boshqa bir qator davlatlar bilan koronavirus sababli havo qatnoviga qo‘yilgan cheklovlarni bekor qilgan. 9-martdan boshlab muntazam bo‘lmagan va muntazam reyslar qatnoviga ruxsat berilgan.
Shuningdek, Saudiya Arabistoni podshohligi mamlakatga keluvchi yo‘lovchilar uchun COVID-19 bilan bog‘liq ba’zi cheklovlarga o‘zgartirish kiritgan. Saudiyaga safar qiladigan ziyoratchilar uchun PZR-test ma’lumotini taqdim etish tartibi bekor qilingan.
O‘zbekiston va Qozog‘iston o‘rtasida 16-martdan ikki tomonlama muntazam xalqaro avtobus yo‘nalishlarida qatnovlar qayta tiklanadi. Xalqaro avtobus qatnovlari koronavirus pandemiyasi sababli 2020-yil 16-mart kuni to‘xtatilgan edi.
Izoh (0)