«Бавария» ҳужумчиси Роберт Левандовски Чемпионлар Лигаси 1/8 финал босқичида «Зальцбург»га қарши ўйиннинг 12, 21 ва 23-дақиқаларида гол уриб, мусобақа тарихидаги энг эрта ҳет-трикни қайд этди.
Роберт Чемпионлар Лигасида бир мавсум давомида икки ва ундан ортиқ ҳет-трик қайд этган 5-футболчига айланди. Аввалроқ Криштиану Роналду (2015/16, 2016/17), Лионель Месси (2011/12, 2016/17), Луис Адриано (2014/15) ва Марио Гомес (2011/12) ушбу натижага эришган. Криштиану Роналду бу кўрсаткич бўйича рекордчи ҳисобланади. Португалиялик ҳужумчи 2015/16 йилги мавсумда учта ҳет-трик қайд этганди.
Қайд этиб ўтиш жоиз, польшалик ҳужумчи ЕЧЛ жорий мавсумидаги голлари сонини 12 тага етказди ва тўпурарга айланиб олди. Ундан кейинги ўринда 11 та гол билан «Аякс» ҳужумчиси Себастьян Аллер жой олган.
Левандовски 2021/22 йилги мавсумда мюнхенликлар сафида барча мусобақалардаги 35 та ўйинда майдонга тушиб, 42 та голни ўз ҳисобига ёздириб қўйди.
«Бавария» Чемпионлар Лигаси нимчорак финалида «Зальцбург»га қарши жавоб учрашувида 7:1 ҳисобида ғалаба қозониб, чорак финал йўлланмасига эга чиқди. Жамоалар ўртасидаги дастлабки баҳсда 1:1 ҳисобида дуранг натижа қайд этилган эди.
Изоҳ (0)