“Bavariya” hujumchisi Robert Levandovski Chempionlar Ligasi 1/8 final bosqichida “Zalsburg”ga qarshi o‘yinning 12, 21 va 23-daqiqalarida gol urib, musobaqa tarixidagi eng erta het-trikni qayd etdi.
Robert Chempionlar Ligasida bir mavsum davomida ikki va undan ortiq het-trik qayd etgan 5-futbolchiga aylandi. Avvalroq Krishtianu Ronaldu (2015/16, 2016/17), Lionel Messi (2011/12, 2016/17), Luis Adriano (2014/15) va Mario Gomes (2011/12) ushbu natijaga erishgan. Krishtianu Ronaldu bu ko‘rsatkich bo‘yicha rekordchi hisoblanadi. Portugaliyalik hujumchi 2015/16-yilgi mavsumda uchta het-trik qayd etgandi.
Qayd etib o‘tish joiz, polshalik hujumchi YChL joriy mavsumidagi gollari sonini 12 taga yetkazdi va to‘purarga aylanib oldi. Undan keyingi o‘rinda 11 ta gol bilan “Ayaks” hujumchisi Sebastyan Aller joy olgan.
Levandovski 2021/22-yilgi mavsumda myunxenliklar safida barcha musobaqalardagi 35 ta o‘yinda maydonga tushib, 42 ta golni o‘z hisobiga yozdirib qo‘ydi.
“Bavariya” Chempionlar Ligasi nimchorak finalida “Zalsburg”ga qarshi javob uchrashuvida 7:1 hisobida g‘alaba qozonib, chorak final yo‘llanmasiga ega chiqdi. Jamoalar o‘rtasidagi dastlabki bahsda 1:1 hisobida durang natija qayd etilgan edi.
Izoh (0)