Россия кучлари Украинанинг Херсон шаҳрини назоратга олгани маълум қилинди

Россия ҳарбийлари Украинанинг Херсон шаҳрини тўлиқ ўз назоратига олди, дея маълум қилди Россия Мудофаа вазирлиги расмий вакили Игорь Конашенков.

«Россия қуролли кучлари бўлинмалари Херсон вилояти марказини тўлиқ назоратга олди», — деди у.

Шунингдек, Запороже вилоятининг Токмак ва Василевка шаҳарлари устидан назорат ўрнатилди, дея қўшимча қилди Конашенков.

Унга кўра, махсус операция давомида Украинанинг 1502 та ҳарбий объекти яроқсиз ҳолга келтирилган, ҳаводаги 11 та ва ердаги 47 та самолёт, шунингдек, 472 та танк ва 46 та дрон йўқ қилинган.

1 март куни Украина Қуролли кучлари Бош штаби Россиянинг Херсонга ҳужуми ҳақида хабар берганди.

Ўз навбатида, шаҳар мэри Игорь Колйхаев шаҳарда «кўплаб портлашлар» содир бўлганини, рус ҳарбийлари «кўчалар бўйлаб ҳаракатланаётгани, окоплар тайёрлаб, мудофааланаётгани», шунингдек, улар темир йўл вокзали ва портни эгаллаб олгани ҳақида айтган.