Украина президенти Владимир Зеленский Reuters ва CNN’га берган интервьюсида Россия президенти Владимир Путин билан музокаралар ўтказишга тайёр эканини маълум қилди. Тўлиқ видео Украина етакчисининг Facebook’даги саҳифасида эълон қилинган.
«Дунё Россия президенти билан музокаралар столида ўтиришга ҳали тайёрлар бор вақтда уни музокаралар столига ўтқазиш кераклигини тушуниб турибди ва мен ҳам», — дейди Зеленский.
Шу билан бирга, давлат раҳбари Россия томони билан музокаралар бошлашнинг дастлабки шартларини айтиб ўтган. «Энг камида одамларни бомбардимон қилишни тўхтатиш керак, шунчаки бомбардимонни тўхтатиш ва шундан сўнг музокаралар столига ўтириш лозим», — дейди у.
Зеленскийнинг маълум қилишича, украиналиклар «умрининг охиригача» курашади. «Чунки биз ўз уйимиздамиз. Биз болаларимиз, уйимизни ҳимоя қиляпмиз. Биз буни чин кўнгилдан амалга оширяпмиз. Ўйлайманки, бугунги кунда ўзлари ҳимояга муҳтож бўлган фарзандларимиз келажаги учун барчасини ҳимоя қилишимиз керак», — дейди президент.
Зеленский, шунингдек, НАТОга аъзо давлатларни Украинанинг ҳарбий альянсга қабул қилиниш истиқболи бор ёки йўқлиги бўйича аниқ жавоб беришга чақирган. Агарда альянс бу каби истиқболга тайёр бўлмаса, президентнинг таъкидлашича, НАТО давлатлари Украина ҳудуди ва чегаралари дахлсизлиги учун ҳуқуқий хавфсизлик кафолатларини бериши керак.
Аввалроқ интернетда Харьковдаги Озодлик майдонига йўлланган ракета ҳужумининг видеолари тарқалган, Зеленский ушбу ҳужумни очиқдан очиқ террор деб атаганди.
Эслатиб ўтамиз, Украина ва Россия делегациясининг махсус операциялар бошланганидан кейинги биринчи учрашуви 28 февраль куни Беларуснинг Гомел вилоятида бўлиб ўтди. Хавфсизлик нуқтаи назаридан учрашувнинг аниқ жойи ошкор этилмади. Украина президенти Владимир Зеленскийнинг маълум қилишича, Россия билан музокаралар давомида Украина хоҳлаган натижага эришиш имкони бўлмаган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)