Президент Владимир Путин Россия ҳудудидан 10 минг доллардан ортиқ валюта олиб чиқиб кетишни тақиқлади. Бу ҳақда Кремль сайтида эълон қилинган президент фармонида сўз боради.
«2022 йил 2 мартдан бошлаб Россия Марказий банкининг расмий курси бўйича ҳисобланган 10 минг доллардан ортиқ нақд хорижий валютани ва (ёки) хорижий валютадаги пул воситаларини олиб чиқиб кетиш тақиқланади», — дейилади фармонда.
Бундан ташқари, фармон билан Россиянинг «дўст бўлмаган мамлакатлар» норезидентларига ва улар томонидан назорат қилинадиган тузилмаларга хорижий инвестицияларни назорат қилиш бўйича ҳукумат комиссиясининг рухсатисиз қимматли қоғозлар ва кўчмас мулк билан операцияларни амалга ошириш, рубль кредитларини олиш тақиқланган.
Ҳужжат матнида таъкидланишича, фармон «АҚШ ҳамда унга қўшилган хорижий давлатлар ҳамда халқаро ташкилотларнинг Россияга қарши санкциялар қўллаш билан боғлиқ дўстона бўлмаган ва халқаро ҳуқуққа зид ҳаракатлари муносабати билан» имзоланган.
Нашрнинг ёзишича, олдинлари Россиядан 10 минг доллардан ортиқ нақд кўринишдаги валютани олиб чиқиб кетиш учун у декларация қилиниши керак бўлган. 2021 йилнинг октябрида «Прайм» агентлиги Россия иқтисодиётидаги нақд хорижий валюта ҳажми 100 миллиард доллар эквивалентга етгани ва бу тарихий максимум экани ҳақида ёзганди.
Аввалроқ Путин ғарб давлатларининг санкцияларига қарши жавоб чораларини кўриш бўйича фармон имзолаган эди. Ҳужжат билан хорижий валютани ўз хорижий ҳисоб рақамларига киритиш, хорижий тўлов хизматларини кўрсатувчи провайдерларга «электрон тўлов воситаларидан фойдаланган ҳолда» пул ўтказиш ва кредит шартномалари бўйича норезидентларга чет эл валютасини ўтказиш тақиқланди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)