1 март куни Швейцариянинг Mediterranean Shipping Company (МSC), Даниянинг Маersk ва Франциянинг CМА-CGM компаниялари Россияга юк контейнерларини етказиб бериш ҳамда ундан бошқа манзилга йўналтиришни тўхтатди.
Контейнерлар бўйича компаниялар Россиянинг Украинага бостириб киргани ва уруш давом этаётгани туфайли мамлакатга нисбатан санкциялар қўлланилганига асосланиб, шундай қарорга келган.
МSC ҳамда Маersk уларнинг қарори озиқ-овқат, тиббиёт воситалари ва ижтимоий юклар каби бирламчи товарлар етказиб берилишига нисбатан татбиқ этилмаслигини билдирган.
Marine Insight денгиз орқали юк етказмалари саноати нашрининг ёзишича, МSC, Маersk ва CМА-CGM дунё бўйича контейнерлар етказиб берувчи уч энг асосий ва катта компаниялар ҳисобланади.
Россияга қарши бир қатор давлатлар, хусусан ЙИ, АҚШ, Канада, Япония, Австралия ва бошқа мамлакатлар санкциялар жорий этган. Чекловлар Россия банклари («ВТБ» ва «Сбербанк» ҳам бор), Россиядан юқори технология маҳсулотларини экспорт қилиш, Марказий банк, Молия вазирлиги, Россия тараққиёт жамғармаси ва катта давлат корпорациялари, Россия Хавфсизлик кенгаши аъзолари, Давлат думаси депутатларига нисбатан ҳам татбиқ қилинган.
28 февралда Владимир Путин АҚШ ҳамда бошқа ғарб давлатларининг дўстона бўлмаган ҳаракатлари ва хориж давлатлари, халқаро ташкилотларнинг чекловларига қарши иқтисодий чора-тадбирлар тўғрисида фармонни имзолаган.
Шунингдек, Буюк Британия ҳукумати Украинадаги урушдаги билвосита иштироки сабаб Беларусь мудофаа вазирининг тўрт ўринбосари ҳамда мамлакатнинг икки мудофаа муассасасини санкциялар рўйхатига қўшиб қўйган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)