Американинг Boeing компанияси Россия авиакомпанияларидаги самолётларига эҳтиёт қисмлар етказиб бериш ва уларга техник хизмат кўрсатишни тўхтатишини маълум қилди, деб хабар беради «Интерфакс».
«Биз Россия авиакомпанияларига эҳтиёт қисмлар етказиб беришни, техник хизмат кўрсатиш ва техник қўллаб-қувватлашни тўхтатдик», — дейилади компания хабарида.
ОАВ маълумотларига кўра, Boeing Украинадаги ваколатхонасини ҳам ёпган, Москвадаги учувчиларни тайёрлаш ўқув маркази фаолиятини тўхтатган.
Хабарда таъкидланишича, ўтган дам олиш кунлари компания ўз мижозларига улар потенциал Россия ва Украинадаги конструкторлик марказларида самолётларга техник хизмат кўрсатиш ва таъмирлаш борасидаги сўровлар борасида кечикишлар бўлиши мумкинлигини хабар берган.
Шунингдек, АҚШ президенти Жо Байден Украинадаги ҳарбий операциялар сабаб Россия учун ҳаво маконини ёпишини эълон қилди.
«Бугун кечқурун биз иттифоқчиларимизга қўшилиб, Америка ҳаво ҳудудини Россиянинг барча парвозлари учун ёпишимизни эълон қиламан», — дейди Байден Конгрессга мурожаатида.
Россияга қарши бир қатор давлатлар, хусусан, EИ, АҚШ, Канада, Япония, Австралия ва бошқа мамлакатлар санкциялар жорий этган. Чекловлар Россия банклари («ВТБ» ва «Сбербанк» ҳам бор), Россиядан юқори технология маҳсулотларини экспорт қилиш, Марказий банк, Молия вазирлиги, Россия тараққиёт жамғармаси ва катта давлат корпорациялари, Россия Хавфсизлик кенгаши аъзолари, Давлат думаси депутатларига нисбатан ҳам татбиқ қилинган.
28 февралда Владимир Путин АҚШ ҳамда бошқа ғарб давлатларининг дўстона бўлмаган ҳаракатлари ва хориж давлатлари, халқаро ташкилотларнинг чекловларига қарши иқтисодий чора-тадбирлар тўғрисида фармонни имзолаган.
Шунингдек, Буюк Британия ҳукумати Украинадаги урушдаги билвосита иштироки сабаб Беларусь мудофаа вазирининг тўрт ўринбосари ҳамда мамлакатнинг икки мудофаа муассасасини санкциялар рўйхатига қўшиб қўйган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)