Ижтимоий тармоқларда Андижонда 8 март — Халқаро хотин қизлар куни муносабати билан уюштириладиган республика тадбирида қатнашиш учун минг доллар талаб қилинаётгани тўғрисида хабарлар тарқалди. Андижон вилоят ҳокимлиги матбуот хизмати мазкур ҳолатга муносабат билдирди.
Маълум қилинишича, Андижон вилоятидан 8 март — Халқаро хотин-қизлар куни байрами муносабати билан республика тадбирига 2019—2021 йиллар давомида юборилган хотин-қизларнинг таркиби кўриб чиқилганда 3 йил давомида қатнашган аёлларнинг такроран юборилганлик ҳолати аниқланмаган.
Таъкидланишича, байрам тадбирига юборилган хотин-қизларнинг давлат ва жамоат ишларида фаол, ташаббускор, мамлакат равнақи учун хизмат қилиб келаётган хотин-қизларнинг номзодлари тақдим этилган.
Ҳозирда ижтимоий тармоқларда қайд этилган ҳақиқатга тўғри келмайдиган, мазкур тадбирда қатнашиш учун юборилиши юзасидан берилган асоссиз маълумот бўйича ҳуқуқ-тартибот органлари томонидан ўрганиш ишлари олиб борилмоқда. Белгиланган тартибда қонуний чора кўрилиши таъминланади.
«Ҳурматли фуқаролар, асоссиз ва ёлғон хабар тарқатишдан эҳтиёт бўлинг. Зеро юқорида келтирилгани каби ёлғон хабарни тарқатган шахс қонунларимизда белгиланган тартибда жазога тортилиши муқаррар», — дейилади муносабатда.
Аввалроқ Андижон шаҳар ҳокими Баҳром Ҳайдаров давлатга 1,7 миллиард сўм зарар етказганликда айбланаётгани, Андижондаги ўқитувчилари узр сўраган мактаб директори ва туман ХТБ мудири ишдан олингани, Асака тумани ҳокими фуқаролар билан номақбул тарзда суҳбатлашгани тўғрисида хабар берилганди.
Изоҳ (0)