Bugun,

  • USD 11095.31
  • RUB 173.84
  • EUR 10772.44

Andijon shahar prokuraturasi tomonidan olib borilayotgan jinoyat ishi doirasida deputat va shahar hokimi Bahrom Haydarovni tergovga jalb qilish maqsadida Andijon viloyati prokuraturasiga taqdimnoma kiritildi, deb xabar beradi “Gazeta.uz”.

Foto: “Daryo”

Foto: “Daryo”

Dastlabki tergov harakatlari davomida Bahrom Haydarov hokimiyat huzuridagi Yer maydonlarini ajratish bo‘yicha doimiy ishlovchi maxsus komissiya a’zolari bilan guruhda Yer kodeksining 17, 23, 62-moddalari, qolaversa, prezident va Vazirlar Mahkamasining qaror hamda farmoyishlariga zid ravishda jismoniy va yuridik shaxslarga auksion orqali o‘zining vakolatidan qasddan foydalanib, yer maydonlarini to‘g‘ridan to‘g‘ri ajratilishi haqida mutasaddi mansabdorlarga ko‘rsatma bergani aniqlangan.

Bundan tashqari, hokim aslida bekor qilingan hujjatlarni asos qilib ko‘rsatgan holda, komissiya dalolatnomalari va yer ajratish to‘g‘risidagi qarorlariga sohta ma’lumotlar va yozuvlar kiritib, 2019—2020-yillarda yer maydonlarini ajratish to‘g‘risidagi qaror va farmoyishlarni qabul qilgan.

Taqdimnomaga muvofiq, Bahrom Haydarov jami 8 ta holatda 19 618 kvadrat metr yerni noqonuniy ajratish orqali jami 1 milliard 779 million so‘m minimal auksion bahosi qiymatidagi pul mablag‘larini davlat budjetiga undirilmay qolishiga sababchi bo‘lgan va davlat manfaatlariga zarar yetkazgan.

Foto: “Gazeta.uz”

Foto: “Gazeta.uz”

Shahar hokimining harakatlarida Jinoyat kodeksining 205-moddasi (hokimiyat yoki mansab vakolatini suiiste’mol qilish) 2-qismi “a” bandi, 209-moddasi (mansab soxtakorligi) 2-qismi “a” bandi va 229-moddasi (o‘zboshimchalik) 2-qismi “a” bandida nazarda tutilgan jinoyatlar tarkibi mavjudligi qayd etilgan. Shundan kelib chiqib, unga nisbatan ehtiyot choralarini qo‘llab lozimgini ko‘rsatilgan.

Nashrning Bosh prokuratura matbuot xizmati rahbari Hayot Shamsutdinovga tayanib yozishicha, mazkur xat asosida 3-fevral kuni Andijon viloyati prokuraturasi tomonidan Xalq deputatlari Andijon viloyati kengashiga taqdimnoma kiritilgan.

“Xalq deputatlari viloyat, tuman va shahar kengashi deputatining maqomi to‘g‘risida”gi qonunning 12-moddasiga ko‘ra, deputatni daxlsizlik huquqidan mahrum qilish to‘g‘risidagi masala tegishincha viloyat, tuman, shahar prokurorining yoki yuqori turuvchi prokurorning taqdimnomasiga binoan xalq deputatlari kengashi tomonidan o‘n kun ichida hal etiladi.

“Kun.uz” nashrining qayd etishicha, oradan 19 kun o‘tgan bo‘lsa-da, Xalq deputatlari Andijon viloyat kengashi prokuror taqdimnomasini ko‘rib chiqishga shoshilmayapti. Qolaversa, qonunda xalq deputatlari kengashining deputatni daxlsizlik huquqidan mahrum qilishga rozilik berish masalasiga doir qarori darhol tegishli prokurorga yuborilishi ham belgilangan.

Ma’lumot uchun, Bahromjon Haydarov 2019-yilning 26-avgustida Dilmurod Rahmatullayev o‘rniga shahar hokimi vazifasini vaqtincha bajaruvchi etib tayinlangandi. O‘sha yilning oktabrida Andijon shahri hokimi lavozimiga tasdiqlandi.

Ta’kidlash joizki, ayrim deputatlar shahar hokimini yerni noqonuniy egallab olganlikda ayblab chiqqandi. Xususan, “Gazeta.uz” 2021-yilning mayida Xalq deputatlari Xalq deputatlari Andijon shahar kengashining sobiq deputati Shuhrat Karimov 19-sonli maktabga qarashli sport maydonchasi hududida ko‘p qavatli turar joy binosining qurilishini bekor qilishga erishganini yozgandi.

Shuhrat Karimov hokim Bahrom Haydarovga so‘rov yuborib, prezident qarori (3931-sonli) buzilayotganini ma’lum qilgan. Maktab ma’muriyati va ota-onalar maktabning o‘quv korpusi 570 o‘quvchiga mo‘ljallangan bo‘lsada, u yerda 1300 bola o‘qiyotgani sabab maktab uchun qo‘shimcha bino qurishni so‘ragandi.

Shuningdek, u hokimning 2021-yil 10-apreldagi — Elevada Ut Group kompaniyasi tomonidan besh qavatli uyni qurish to‘g‘risidagi qarori noqonuniy ekanini ma’lum qilgan. Sobiq deputat prezidentning 4427-sonli qaroriga ko‘ra, qishloq xo‘jaligi uchun mo‘ljallanmagan bo‘sh yer uchastkalari “E-ijro auksion” orqali kimoshdiga qo‘yilmasdan, uning talablari buzilganini aytgandi.

Shuhrat Karimov, shuningdek, jurnalist Xurshid Daliyevning Andijonda noqonuniy yer ajratish va noqonuniy qurilish ishlari to‘g‘risidagi xabarlari sabab Bosh prokuraturaga so‘rov yuborgan edi. Uning so‘zlariga ko‘ra, qonun buzilish holatlari shahar adliya bo‘limi tomonidan ham tasdiqlangan. U viloyat prokurorlarining mazkur masalalar bo‘yicha harakatsizligi sabab ularning malakasini shubha ostiga olgan va Andijon prokuraturasi xodimlariga jamoatchilik bahosini berishni so‘ragan.

Oxir-oqibat o‘zi muassis bo‘lgan kompaniyaga qarshi ochilgan jinoyat ishi doirasida deputat daxlsizligi mahrum qilingan, keyinroq esa Karimovning o‘zi hibsga olingandi. Korrupsiyaga qarshi kurashish agentligi va jamoatchilik deputatni qo‘llab-quvvatlab chiqqandi.

Andijon shahar kengashi deputati Jahongir Jiyanov ushbu holatlar Shuhrat Karimovning intervyusi “Deputat 40 daqiqada Andijon shahar hokimining barcha kirdikorlarini fosh qildi” sarlavhasi bilan ijtimoiy tarmoqlarda joylashtirilganidan so‘ng yuz berganini “Daryo”ga ma’lum qilgandi.

Izoh
Asosiy yangiliklar
Madaniyat
“Xudodan qo‘rqmagan odamdan qo‘rqdim”. O‘zbekiston xalq artisti Bobomurod Hamdamov oilaviy nizolar tufayli ijara uyda yashamoqda (video)
Mahalliy
“Odamlar o‘limida o‘zimni aybdor hisoblamayman” — Nukusdagi tartibsizliklar yetakchisi Dauletmurat Tajimuratov
Mahalliy
Samarqandda o‘quvchining onasi “zamdirektor”ni kaltakladi