Ҳозирги пайтда Катовице (Польша) аэропортига 262 нафар Ўзбекистон фуқароси олиб келинган, деб хабар беради «Дунё» агентлиги.
Маълум қилинишича, 28 февраль куни Ўзбекистондан парвоз қилган Uzbekistan Airways АЖ махсус самолёти Тошкент вақти билан соат 12:45 да Катовице аэропортига қўнади.
Ўзбекистоннинг Киевдаги элчихонасидан олинган маълумотга кўра, Украинанинг «Краковец» назорат ўтказиш пункти орқали фуқаролар ўтказилишини тезлаштириш мақсадида 7 та автобус ижарага олинган. Улар кўмагида шу пайтгача Украина—Польша чегарасига 11 марта қатнов амалга оширилган.
Айни пайтга қадар 560 нафардан кўпроқ Ўзбекистон фуқароси Польша давлат чегарасини кесиб ўтган.
«Польшанинг чегара ҳудудида Ўзбекистоннинг Варшавадаги элчихонаси ходимлари томонидан ташкилий масалалар ҳал қилинмоқда. Чегарада юртдошларимиз озиқ-овқат билан таъминланмоқда, кексалар ва ёш болали аёлларнинг дам олиши учун шароит яратилган. Бу борадаги ишлар давом эттирилмоқда», — дейилади хабарда.
Эслатиб ўтамиз, Ўзбекистон Ташқи ишлар вазирлиги Украина ҳудудида 4300 га яқин Ўзбекистон фуқароси борлигини маълум қилганди.
Ўзбекистоннинг Украинадаги элчихонаси хабарига кўра, 26 февраль куни Тошкент вақти билан соат 20:30 да 90 дан зиёд Ўзбекистон фуқароларидан иборат биринчи эвакуация гуруҳи Львовдан «Краковец» назорат-ўтказиш пункти йўналиши бўйлаб йўлга чиққан.
Кейинроқ элчихона мамлакатдаги ўзбекистонлик фуқароларни эвакуация қилиш ишлари ҳақида қўшимча маълумот берди. Унда айтилишича, чегарани кесиб ўтиш узоқ вақт олади, биринчи гуруҳ учун бу жараён 14 соат давом этган.
Элчихона, шунингдек, мамлакатни тарк этиш учун Молдовага кетмоқчи бўлган фуқароларга мурожаат билан чиқди. Элчихона хавфсизлик тамойилидан келиб чиқиб, фуқаролар учун Молдовага бориш осонроқ бўлса, ушбу вариантни кўриб чиқишлари лозим эканини билдирган.
Ташқи ишлар вазирлиги берган маълумотга кўра, 27 февраль ҳолати бўйича 600 дан зиёд Ўзбекистон фуқароси Польша чегарасига етказилган. Фуқароларини эвакуация қилиш ишлари изчил давом этмоқда.
Изоҳ (0)