Навоий шаҳрида беморнинг касаллик варақасини бериш учун унинг онасини жинсий алоқа қилишга мажбурлаб келган шифокор қўлга олингани тўғрисида хабар берилганди. ССВ матбуот хизматининг маълум қилишича, ушбу шифокор ишлаган марказнинг директори ўз лавозимидан озод этилган.
Навоий вилояти болалар кўп тармоқли тиббиёт марказининг Неврология бўлими мудири вазифасида ишлаган К.Р. даволаниш учун ётган иккинчи гуруҳ ногирони Г.И.нинг даволангани бўйича бир ярим ой давомида касаллик варақасини (кўчирма) бермасдан келган. У беморнинг онаси Т.Л.ни қаршилигига қарамасдан касаллик варақасини бериш учун у билан жинсий алоқа қилишга мажбурлаб келган.
«Соғлиқни сақлаш вазирлиги касб ва тоифа танламайдиган ахлоқсизликлар тиббиёт ходимлари орасида ҳам кузатилишини оқ халатга тушган доғ деб ҳисоблайди. Шу билан бирга, бу каби иллатларга нисбатан муросасиз муносабатда бўлади. Қолаверса, тиббиёт ходимларининг қадр-қиммати ва инсонлик шаъни оёқости қилинишига қарши туради. Шу сабабдан ҳам бундай ҳолатларда ҳодисанинг асл моҳияти аниқлаштирилгач, якуний хулосага келиш мақсадга мувофиқ», — дейилади хабарда.
Маълум қилинишича, айни пайтда воқеа юзасидан ҳуқуқни муҳофаза қилувчи органлар томонидан суриштирув ишлари давом эттирилмоқда.
Шу билан бирга, жамоада одоб-ахлоқ қоидаларини назорат қилишда сусткашликка йўл қўйгани ва қўл остидаги ходимлари устидан етарли назорат ўрнатмагани учун марказ директори Ш.Худойбердиев эгаллаб турган лавозимидан озод этилган.
«Шу ўринда юртдошларимиз ва тиббиёт ходимларидан тизимдаги ноқонуний хатти-ҳаракатларга дуч келишса, дарҳол вазирликнинг мазкур бошқармасига қарашли 71-241-10-65 телефон рақамига мурожаат қилишларини сўраймиз», — дея таъкидланади хабарда.
Изоҳ (0)