Ўзбекистоннинг Киевдаги эчихонаси Украинада таълим олаётган ўзбекистонлик талабалар ўз ватанига вақтинчалик жўнаб кетиши сабаб мамлакат олий ўқув юртларидаги ўқишларини сақлаб қолиш масаласи бўйича кўплаб мурожаатлар келиб тушаётганини инобатга олган ҳолда, мурожаат билан чиқди.
Унга кўра, Украина Таълим ва фан вазирлиги 2022 йил 25 январдаги 1/1266-сонли ва 2022 йил 15 февралдаги 1/2588-22-сонли хати билан Украинанинг барча олий ўқув юртларига масофавий таълимни жорий этишни тавсия қилган. Мамлакат ОТМларига ҳар қандай сабабга кўра талабаларни ўқишдан четлаштиришдан сақланиш топширилган, ўқишни мустақил равишда тарк этиш истагини билдирган талабалар бундан мустасно.
Ушбу қоида тиббиётдан ташқари барча мутахассисликлар талабаларига тегишли.
Юқоридагиларни ҳамда ҳаво қатновида кузатилган узилишларни ҳисобга олган ҳолда ўзбекистонлик талабаларга ўз ватанларида ўқишни масофавий шаклда давом эттириш имкониятларини кўриб чиқиш тавсия этилади.
Аввалроқ Ўзбекистон Украинадаги фуқароларини эвакуация қилишга тайёрланаётганини маълум қилганди. Таъкидланишича, Украина ҳаво ҳудудининг ёпилишини инобатга олган ҳолда жўнаб кетиш йўналишлари ва жўнаб кетиш жойи ишлаб чиқилмоқда.
Мавзуга доир:
Изоҳ (0)