Гурбангули Бердимуҳамедов истеъфога чиққач, Туркманистонга катта эҳтимол билан унинг ўғли раҳбар бўлади. Кичик Бердимуҳамедов ҳақида нималар маълум?

11 февраль куни Гурбангули Бердимуҳамедов Туркманистон президенти лавозимидан истеъфога чиқмоқчилигини маълум қилди. Давлат раҳбари бу ҳақда Халқ Маслаҳати (мамлакат парламентининг юқори палатаси) йиғилишида айтди. Унда 2021 йил якунлари ва келгуси 30 йилга мўлжалланган давлат сиёсатининг «устувор вазифалари» муҳокама қилинди. Ўша куни Бердимуҳамедов биринчи марта давлат раҳбари этиб сайланганига 15 йил тўлганди.

64 ёшли Арқадағ ўзининг «ёш етакчиларга йўл очиш» ҳақидаги «қийин» қарорини икки йил аввал «пайғамбарлик ёшига етгани» билан изоҳлади. У парламент юқори палатасига раисликни ўзида сақлаб қолмоқчи. Давлат раҳбари бошқа ваколатлар ҳақида гапирмади.

Бердимуҳамедов ўз қарорини эълон қилган куннинг эртасига Мажлис (парламент қуйи палатаси) Туркманистонда муддатидан олдин президентлик сайловларини 2022 йил 12 мартга белгилади. Мустақил Туркманистон тарихида ҳозиргача бор-йўғи икки нафар президент бўлган: Бердимуҳаммедов ва ундан олдинги президент Сапармурод Ниёзов.

Туркманистоннинг амалдаги раҳбар ўзидан кейинги вориси кимлигини айтмади, бироқ маҳаллий ва хорижий ОАВ унинг якка-ю ягона ўғли Сердар Бердимуҳамедов мамлакатнинг янги раҳбари бўлишига заррача шубҳа қилмаяпти. 2021 йил сентябрь ойида Сердар 40 ёшини нишонлаган ва президентликка номзод учун зарур ёш чегарасидан ўтганди.

Мутахассисларнинг фикрича, ҳокимиятни катта Бердимуҳамедовдан кичик Бердимуҳамедовга ўтказиш жараёни сўнгги бир неча йилдан буён давом этган ва ўтган йили «маррага» етиб келган. Фақатгина иқтисодий аҳволнинг ёмонлашиши ва аҳоли орасда норозиликнинг кучайиши жараёнга тўсқинлик қилиши мумкин, дейди экспертлар.

«Хроника Туркменистана» қайд этганидек, 2016 йилнинг кузига қадар Бердимуҳамедовнинг ўғли ҳақида деярли ҳеч нарса маълум эмасди. У биринчи марта 2012 йилги президентлик сайловида отаси билан сайлов участкасига борганида оммавий ахборот воситаларида тилга олинган.

Кичик Бердимуҳамедов ҳақида батафсилроқ маълумотлар 2016 йилда, у илк бор Туркманистон парламентига депутат этиб сайланганидан кейин пайдо бўлди. 2018 йилги парламент сайловлари олдидан давлат матбуоти унинг тўлиқ таржимаи ҳолини эълон қилди. Шундан маълум бўлишича, Сердар Бердимуҳамедов 1981 йил 22 сентябрда туғилган, оилали, тўрт фарзанди бор. Дастлабки маълумоти бўйича технологик муҳандис, бир неча йил озиқ-овқат саноати ва нефть-газ соҳасида ишлаган.

Кичик Бердимуҳамедов сиёсатга киришдан аввал Россия Ташқи ишлар вазирлигининг Дипломатик академиясида таҳсил олган. Шунингдек, Женева хавфсизлик сиёсати марказида Европа ва халқаро хавфсизлик бўйича магистрлик даражасини олган. У ўқиш давомида Москвадаги Туркманистон элчисининг маслаҳатчиси ва Женевада Туркманистоннинг БМТдаги доимий вакили лавозимларида ишлаган.

Кичик Бердимуҳамедов давлатга хизмати мобайнида Ташқи ишлар вазирлигида ишлаган, саноат вазирлиги раҳбари, шунингдек, Ахал вилояти губернатори бўлган. Вилоятда у билан ишлаган собиқ ходимларнинг сўзларига кўра, қўл остидагилар билан суҳбатида президент ўғлининг энг яхши кўрган ибораси «Бўйнингни синдираман!» эди. Бундан ташқари, уларга ўз кабинетларини заруратсиз тарк этиш тақиқланган, хонадан чиқадиган бўлса, кичик Бердимуҳаммедов бинода бўлганида шовқин қилмаслик талаб этилган.

2021 йил февраль ойида Сердар Бердимуҳамедов янги ташкил этилган бош вазир ўринбосари лавозимига тайинланди. Ўшанда у аслида отасининг ўринбосарига айланди – Туркманистонда бош вазир лавозими йўқ, ҳукуматни эса президент бошқаради. Айни пайтда президентнинг ўғли Туркманистон Олий назорат палатасига раис ҳам бўлди ва мамлакат хавфсизлик кенгашига кирди.

2014 йилда Сердар Бердимуҳамедов Туркманистон Фанлар академиясида номзодлик диссертациясини ҳимоя қилган, сўнг бир йилдан камроқ вақт ичида техника фанлари доктори илмий даражасини олган. У миллий жанг санъати федерациясини ҳам бошқаради ва Туркманистонда хизмат кўрсатган мураббий фахрий унвонига эга.

Кичик Бердимуҳамедовнинг севимли машғулотлари отасининг спорт, машина ва отларга бўлган муҳаббатини тўлиқ такрорлайди. Давлат оммавий ахборот воситаларида ота ва ўғилнинг от миниш, спорт тадбирлари ва автопойгаларда бирга қатнашиши ҳақида хабарлар бериб турилади.

Туркманистонда сайлов кампанияси расман 14 февраль куни бошланди. Сайлов ва референдум ўтказувчи марказий комиссиянинг баёнотига кўра, даъвогарлар шу кундан бошлаб ўз номзодини кўрсатиши мумкин. Ўша куни Туркманистон Демократик партиясининг навбатдан ташқари IX съездида мамлакат президентлигига Сердар Бердимуҳамедовнинг номзоди илгари сурилди.