АҚШ Украинадаги элчихонасини вақтинча Киевдан Львовга кўчириб туради. Бу ҳақда давлат котиби Энтони Блинкен маълум қилди.
Блинкеннинг сўзларига кўра, ходимлар Украинадаги вазиятни юмшатиш бўйича дипломатик саъй-ҳаракатларни мувофиқлаштириш бўйича ўз вазифаларини, шунингдек, мамлакат расмийлари билан алоқаларни қўллаб-қувватлашни давом эттиради.
The Wall Street Journal’нинг ёзишича, бошқа шаҳарга кўчирилаётгани сабаб дипломатик миссиянинг Киевдаги биносида жойлашган компьютерлар ва тармоқ аппаратлари йўқ қилинади.
АҚШ Давлат департаменти 12 февраль куни ўта муҳим бўлмаган лавозимда ишловчи дипломатлардан Украинани тарк этишни талаб қилди. Ўшанда идора қолган ходимларда Киевда ишлашни давом эттиришини маълум қилганди.
Киевдаги элчихоналарнинг ходимлари Львовга кўчирилиши ҳақида бундан олдин бошқа ғарб давлатлари, хусусан, Канада, Австралия ва Нидерландия ҳам эълон қилган. Германия Украинанинг шарқий қисмидаги Днепр шаҳри жойлашган бош консуллигини кўчирган.
Тобора таранглашиб бораётган Россия—Украина ўртасидаги вазият ортидан кўплаб мамлакатлар ўз фуқароларини Украинани зудлик билан тарк этишга чақирмоқда. 10 февралда АҚШ давлат департаменти фуқароларга Украинага бормаслик ёки зудлик билан Россия ҳарбий ҳаракатлари хавфи бўлган ва COVID-19 билан касалланишлар кўпайган ҳудуддан кетишни тавсия этди. АҚШ президенти Жо Байден Украинадаги барча америкаликларни ҳозироқ мамлакатдан кетишга чақирди. АҚШдан кейин Нидерландия, Черногория, Япония, Латвия, Буюк Британия ва Жанубий Корея ҳам фуқароларидан Украинага бормасликни сўради.
Politico манбалари айнан 16 февраль санасини АҚШ президенти Жо Байден НАТОдаги иттифоқчиларига Россия агрессияси бошланишининг норасмий санаси сифатида кўрсатгани ҳақида хабар берганди. Зеленский АҚШ тахмин қилган ҳужум санасини Украина бирлиги куни деб эълон қилди.
Изоҳ (0)