Serdar Berdimuhamedov Turkmaniston prezidentligiga nomzod etib ko‘rsatildi

Gurbanguli Berdimuhamedov o‘g‘li, iqtisodiyot bo‘yicha bosh vazir o‘rinbosari Serdar Berdimuhamedov bo‘lajak saylovlarda mamlakat prezidentligiga nomzod etib ko‘rsatildi. Bu boradagi qaror Turkmaniston Demokratik partiyasining 14-fevral kuni o‘tkazilgan navbatdan tashqari IX syezdida qabul qilingan, deb xabar beradi “Turkmenistan segodnya” davlat axborot agentligi.

“Syezd qatnashchilari Turkmaniston prezidentligi lavozimiga nomzodini qo‘yayotgan Serdar Berdimuhamedovning nutqini tingladi va uni qo‘llab-quvvatlagan”, — deyiladi xabarda.

Serdar Berdimuhamedov — respublikaning amaldagi prezidenti Gurbanguli Berdimuhamedovning yagona o‘g‘li (yana ikkita qizi bor). U 1981-yilda tug‘ilgan. Saparmurat Niyazov nomidagi Turkmaniston qishloq xo‘jalik universitetini muhandis-texnolog mutaxassisligi bo‘yicha tamonlagan. 2008—2011-yillarda Rossiya TIV diplomatiya akademiyasida, 2011—2013-yillarda Jenevadagi xavfsizlik siyosati markazida tahsil olgan.

2020-yilning fevralida Serdar Berdimuhamedov sanoat vaziri lavozimini egallagan, 2021-yilning fevralidan esa Turkmaniston bosh vaziri o‘rinbosari lavozimida ishlab kelayotgan edi. Iyul oyida Serdar Berdimuhamedov bosh vazirning moliya va iqtisodiyot bo‘yicha o‘rinbosari etib tayinlangan.

Eslatib o‘tamiz, 11-fevral kuni Turkmaniston parlamenti oliy palatasining navbatdan tashqari yig‘ilishida mamlakatni 15 yildan beri boshqarib kelayotgan Gurbanguli Berdimuhamedov boshqaruvchi yoshlarga topshirish va faoliyatini Xalq maslahati raisi sifatida davom ettirish borasidagi niyatini ma’lum qilgan.

Xalq maslahatining navbatdan tashqari yig‘ilishida so‘zga chiqqan faxriy oqsoqollar prezident Berdimuhamedovning mamlakat rahbariyatiga yosh kadrlarni jalb etish to‘g‘risidagi qarorini qo‘llab-quvvatlagan. Keyinroq u Markaziy saylov komissiyasiga muddatidan oldin prezidentlik saylovlarini o‘tkazishga tayyorgarlikni boshlash bo‘yicha topshiriq bergan. Turkmanistonda muddatidan oldin prezidentlik saylovlarini 12-martda o‘tkazish rejalashtirilmoqda.