Канадада COVID-чекловлари ва бош вазир Жастин Трюдога қарши кенг кўламли акция давом этмоқда. Полиция ҳаракатларига қарамай, намойишчилар АҚШ билан чегарадаги кўчалар ва асосий кўприкни тўсиб қўйган (фото)
23 январдан буён Канадада коронавирус чекловларига қарши кенг кўламли норозилик намойишлари ўтказилмоқда. Акция иштирокчилари бош вазир Жастин Трюдо раҳбарлигидаги ҳукумат сиёсатидан ҳам норози. Намойишларни дастлаб юк машина ҳайдовчилари бошлаб берганди. Улар Канада ва АҚШ чегарасини кесиб ўтишда икки ҳафталик карантиндан ўтиш ёки коронавирусга қарши эмланганлик гувоҳномасини кўрсатиш кераклигини назарда тутувчи янги қоидаларнинг бекор қилинишини талаб қилди. Ҳайдовчилар «Озодлик карвони» (Freedom Convoy) деб номланган акция – мамлакат пойтахти Оттавага оммавий йўл олган машиналар ҳаракатини уюштирди. Минглаб одамлар уларга қўшилди.
Икки ҳафтадирки Оттава марказида йирик намойиш бўлиб ўтмоқда — юзлаб юк машиналари ва бошқа транспорт воситалари, шунингдек, чодирли лагерлар кўчаларни тўсиб қўйган. 7 февраль куни шаҳарда фавқулодда ҳолат жорий этилди, бош вазир ва унинг оила аъзолари хавфсизлик нуқтаи назаридан расмий қароргоҳини тарк этди. Намойишчилар АҚШ–Канада чегарасидаги асосий ўтиш жойи бўлган Амбассадор кўпригини ҳам тўсиб қўйган. Уларнинг таъкидлашича, норозилик намойишлари юк машина ҳайдовчилари учун эмланиш талаби бекор қилиниб, Канада ҳукумати томонидан имтиёзлар берилгандан кейингина тугайди.
COVID-чоралари ва ҳукуматга қарши норозилик билдираётган одамларнинг автомашиналари Оттавадаги кўчани тўсиб қўйган. Намойишчилар сони полициядан анча кўп. 12 февраль, 2022 йил.Фото: Getty Images
Намойишчилар Амбассадор кўприги (The Ambassador Bridge) устида ҳаракатланишни тўсиб қўймоқда. 2286 метрлик осма кўприк Детройт дарёси орқали Канаданинг Виндзор ва Американинг Детройт шаҳрини боғлайди. Автомобиль ишлаб чиқарувчилари кўприк блокадасидан азият чекмоқда: ушбу йўналишда одатда кунига 300 миллион долларлик товар ташилади, уларнинг учдан бир қисми автомобиль саноатига боғлиқ. Онтариодан Алабамагача жойлашган заводлардан айримлари ёпилишга мажбур бўлди. 11 февраль, 2022 йил.Фото: Getty Images
Канада бош вазири Жастин Трюдонинг айтишича, мамлакатдаги 120 000 юк машинаси ҳайдовчиларининг 90 фоизи тўлиқ эмланган. У намойишчиларни «озчилик гуруҳ» деб атади. Канадаликларнинг ҳаммаси ҳам намойишчиларни қўллаб-қувватламади. Суратда одамлар намойишчилар томонидан тўсиб қўйилган Амбассадор кўпригида ибодат қилмоқда. 11 февраль, 2022 йил.Фото: Getty Images
Полиция ходимлари саф тортган ҳолда, Амбассадор кўприги блокадасини олиб ташлашга уринди, бироқ улар намойишчиларнинг фақат бир қисмини ҳайдаб чиқаришга муваффақ бўлди. Ҳаво совуқлигига қарамай, намойишчилар сони ортган. 13 февраль, 2022 йил.Фото: Getty Images
Амбассадор кўпригида қонунбузарлардан бирини қўлга олаётган полиция. Намойишлар бошланганидан бери Канадада тартибсизлик, ўғрилик, мулкка зарар етказиш ва нафрат қўзғатиш жиноятлари бўйича 60 дан ортиқ жиноий иш очилган. 13 февраль, 2022 йил. Фото: Getty Images
Оттава марказидаги Канада парламенти олдига йиғилган намойишчилар. Маҳаллий полиция маълумотларига кўра, 12 февраль куни ўтказилган акцияда тўрт мингдан ортиқ киши иштирок этган. Фото: EPA
Ҳайдовчилар акцияси билан бирга уларни қўллаб-қувватлаш учун интернетда маблағ йиғиш бошланди – бир неча кун ичида ҳайдовчиларга тўққиз миллион Канада доллари хайрия қилинди. Йиғилган маблағлар меҳмонхона хоналари, газ ва намойишчиларнинг овқати учун сарфланади. Суратда норозилик намойиши иштирокчилари шиширилган бассейнда. Оттава, 12 февраль, 2022 йил.Фото: AFP
Изоҳ (0)