Украина президенти Владимир Зеленский мамлакат фуқароларига йўллаган видеомурожаатида 16 феврални республикада миллий байрам — Украина бирлиги куни деб эълон қилди.
АҚШ расмийлари ҳамда ғарб ОАВ мазкур санани Россиянинг Украинага ҳужум уюштириши мумкин бўлган кун деб тахмин қилганди.
«16 февраль ҳужум куни бўлиши ҳақида гапиришмоқда. Биз ушбу санани мамлакатда халқ бирлашуви куни қиламиз. Тегишли фармон аллақачон имзоланган. Шу куни миллий байроқларимизни баланд кўтарамиз, кўк-сариқ ленталар тақамиз ва бутун дунёга Украинанинг бирлашган халқ эканини намойиш қиламиз», — деган Зеленский.
Bloomberg, Spiegel ва Politico каби бир қатор ахборот агентликлари Россиянинг 15–16 февраль кунлари Украинага ҳужум қилишга тайёрланаётганини хабар қилган.Politico маълумотларига кўра АҚШ президенти Жо Байден Вашингтоннинг Европадаги иттифоқчилари билан онлайн музокараларда Россия 16 февралда қуролли ҳужумни бошлашини маълум қилган. АҚШ президенти администрациясидаги икки манба ҳам 16 февраль Россиянинг Украинага бостириб кирадиган куни бўлиши мумкинлигини Politico’га тасдиқлаган, аммо исмини ошкор этмаган британиялик амалдор Лондон ушбу ахборотни бошқача талқин қилаётганини айтган. Европа мамлакатларидаги яна икки нафар дипломат газета вакили билан суҳбатда ушбу ахборотларга ишонмаётганини қайд этган.
Вашингтон ўз қоидаларига кўра, бу борада аниқ саналар ҳақида расмий изоҳ бермаган. АҚШ президентининг миллий хавфсизлик масалалари бўйича ёрдамчиси Жейк Салливан CNN’га берган интервьюсида ҳужум санаси қачон бўлишини гапирмаган, лекин бу исталган вақтда содир бўлиши мумкинлиги ҳақида айтган. Салливан Вашингтондагиларнинг фикрича, Москва Пекиндаги қишки Олимпиада ўйинлари вақтида ёки ушбу мусобақалардан кейин ҳам Украинага бостириб кириши мумкинлигини таъкидлаган. Шунингдек, АҚШ давлат котиби Энтони Блинкен ҳам шунга яқин гапларни айтиб ўтган.
CNN манбалари ҳужумнинг тахминий санаси ҳақидаги масалалар Киев ҳамда Вашингтон ўртасида қарама-қаршиликларни юзага келтирганини билдирган. Зеленскийнинг фикрича ҳужум эҳтимоли кам, АҚШ расмийларининг баёноти вазиятни мураккаблаштириб юбормоқда. Ўз навбатида Байден ва унинг администрацияси Зеленскийнинг Россия таҳдидига жиддий эътибор қаратмаётганидан норози, деган CNN телеканалининг суҳбатдошлари.
Аввал Владимир Зеленский оиласи билан бирга Украинада эканлиги ва мамлакат чиқиб кетиш нияти йўқлигини айтганди.
Изоҳ (0)