«Барселона» ҳимоячиси Рональд Араухо «Эспаньол»га қарши ўйиндан (2:2) сўнг рақиб футболчиси Нико Меламед билан тортишиб қолди.
Учрашувнинг 90+2-дақиқасида «Эспаньол» футболчиси Нико «Барселона» ҳимоячиси Херард Пике билан жанжалдан сўнг иккинчи сариқ карточкани олди ва майдонни тарк этди.
Захира ўриндиғида ўтирган Араухо ҳиссиётларини жиловлай олмади ва кийим алмаштириш хонасига кетаётган Меламедга юзланиб, «Эспаньол»ни Сегундага (Испаниянинг иккинчи лигаси) қайтишига шама қилиб, рақибга икки бармоғини кўрсатди.
Кейинчалик каталонияликлар ҳимоячиси қилган ишидан пушаймонлигини билдириб, Twitter саҳифасида узр сўради:
«Номақбул ҳаракатим учун ‘Эспаньол’ клуби аъзоларидан узр сўрайман. Бу шиддатли дербида юзага келган кескинлик натижасида содир бўлди.
Рақиб ва клубларни ҳурмат қиламан, шунинг учун содир бўлган воқеадан фахр туймаяпман», — деб ёзади футболчи ўз саҳифасида.
«Эспаньол» 24 ўйиндан сўнг Ла Лиганинг 13-поғонасида бормоқда. 2020/21 йилги мавсумда жамоа Испаниянинг иккинчи дивизионида ўйнаганди.
Хави шогирдлари Испания чемпионатида 23 та ўйиндан сўнг 39 очко билан тўртинчи ўриндан жой олди.
Изоҳ (0)