«Челси» ва «Барселона» нидерландиялик ҳимоячи учун кураш олиб боради

«Ювентус» ҳимоячиси Maттeйс де Лигт ёзги трансфер ойнасида жамоасини ўзгартириши мумкин.

Calciomercato’нинг хабарига кўра, 22 ёшли нидерландга Лондоннинг «Челси» ва Каталониянинг «Барселона» клублари қизиқиш билдирмоқда.

Агар «Ювентус» футболчи билан шартномани узайтириш борасида келишувга эришмаса, уни сотиб юбормоқчи. Matteйснинг туринликлар билан шартномаси 2024 йилнинг ёзига қадар мўлжалланган.

«Барселона» ҳимоячи учун 75 миллион евро тўлашга тайёр. «Челси» бундан кўпроқ таклиф билдиришга уриниб кўради, чунки «аристократлар» бош мураббийи Томас Тухель жамоанинг ҳимоя чизиғини кучайтирмоқчи.

Де Лигт 2019 йилда «Аякс»дан «Ювентус»га 85,5 миллион евро эвазига ўтган эди. Transfermarkt’да ҳимоячининг трансфер қиймати 65 миллион еврога баҳоланган.

Maттeйс 2021/22 йилги мавсумда Италия чемпионатида 20 та ўйин ўтказиб, битта гол муаллифига айланди.