Литва президенти Гитанас Науседа мамлакат ҳудудида АҚШ қўшинларининг доимий асосда фаолият юритишини сўраб, Вашингтонга мурожаат этмоқчилигини маълум қилди, деб ёзмоқда Reuters.
«АҚШ билан Америка ҳарбийларининг ротацион кучлари Литвада мунтазам бўлишини таъминлаш юзасидан музокаралар олиб борамиз», — деган Науседа матбуот анжуманида.
Литва президентининг фикрига кўра, ушбу қадам НАТО томонидан тийиб туриш сиёсати ва нафақат Литва, балки бутун минтақада хавфсизликни мустаҳкамлашга хизмат қилади.
Аввалроқ Гитанас Науседа Германия ва АҚШ билан Литвадаги ҳарбий контингентни ошириш юзасидан музокаралар олиб бораётгани хабар қилинганди. Президент бу ҳақда Украина чегарасига, хусусан, Беларусга 100 минг нафар Россия ҳарбийлари жойлаштирилгани фонида гапирган. Науседа Литванинг 1990–1991 йиллардаги мустақилликка энди эришган давридаги каби ўта оғир вазиятда қолгани ҳақида гапирган.
Болтиқбўйи мамлакатларида АҚШ ҳарбийларининг ротацияси 2014–2017 йилларда ўтказилган ва Россиянинг Украинадаги ҳаракатларига жавоб сифатида қабул қилинган. Литва, Латвия, Эстония ва Польша НАТОда халқаро батальон тузгач, АҚШнинг Болтиқбўйидаги ҳарбий бўлинмалари ушбу мамлакатларни тарк этган. Бироқ 2019 йилда АҚШ яна Литвага 500 нафарга яқин аскари бўлган ротацион ҳарбий гуруҳларни жойлаштиришни бошлаган.
Аввалроқ Эстония ва Латвия 693 миллион евролик ҳарбий техника сотиб олмоқчилиги, АҚШ Болтиқбўйи давлатларининг Украинага Javelin ва Stinger етказиб беришига рухсат бергани, Литва россиялик ҳарбийларнинг Беларусга келишини тўғридан-тўғри таҳдид сифатида баҳолагани, Эстония, Латвия ва Литва НАТОдан уларнинг ҳудудидаги ҳарбий иштирокини оширишни сўрагани ҳақида хабарлар берилган.
Изоҳ (0)