Дания қироличаси Маргрете II ҳамда Испания қироли Филипп VI коронавирусга чалинишди. Бу ҳақда Дания қироллигининг матбуот хизмати ҳамда Испания қироллик саройи маълум қилган.
81 ёшли Маргретенинг 8 февраль куни топширган тести таҳлили «мусбат» деб баҳоланган. Қироличада COVID-19 нинг енгил белгилари кузатилмоқда, дейилади қироллик саройининг хабарида. Маргрете касаллик сабаб Норвегияда ўтказиши керак бўлган таътилни бошқа муддатга қолдирди ва Копнегагендаги Алиенборг қироллик саройида – ўз резиденциясида ижтимоий яккалаш тартибига ўтган.
54 ёшли Испания қироли Филипп 9 февраль куни коронавирусга тест топширган ва шу куни оқшомда унда касалликнинг енгил белгилари кузатилган. У ҳам ўз қароргоҳида етти кунлик ижтимоий яккаланиш тартибига ўтди. Қирол оиласининг бошқа аъзоларида COVID-19 аломатлари кузатилмаган, дейилади Испания қироллиги саройининг хабарида.
Данияда 1 февралдан бошлаб коронавирус сабаб жорий этилган ички чекловлар бекор қилинган. Ҳукумат ушбу қарорни мамлакат аҳолиси орасида коронавирусга қарши эмланиш кўрсаткичининг юқорилиги (аҳолининг 81 фоизи вакцинанинг иккала дозаси билан эмланган) ва касалхоналарда COVID-19 га чалинган беморлар кескин камайгани билан изоҳлаган. Испанияда эса 10 февралдан кўчаларда тиббий ниқоб тақиб юриш мажбурияти олиб ташланади.
Январь бошида Швеция қироли Карл Густав XVI ва унинг рафиқаси Силвияда коронавирус аниқланган. Қироллик оиласининг расмий вакили Маргарета Торгрен монархларнинг вакцинация қилингани ва мамлакатда COVID-19 билан касалланиш ҳолатлари кўпайгани туфайли тест топширганини қайд этган. Қирол ва унинг рафиқаси коронавирусга қарши эмлангани сабаб уларда касаллик енгил кечган, бироқ шунга қарамай, улар маълум вақт оиладан алоҳида яшаган, яъни ўзни яккалаш тартибига ўтган.
Аввалроқ Эрдўғон Киевга сафаридан сўнг омикронга чалингани, Арманистон бош вазири Никол Пашинянда яна коронавирус аниқлангани, Польша собиқ президенти Лех Валансе коронавирусга чалинганини маълум қилгани ҳақида хабарлар берилган.
Изоҳ (0)